Հանգիստ, անշարժ գույք, թանկարժեք իրեր. ինչի՞ վրա են միլիոններ ծախսել ՔՊ-ական պաշտոնյաները

2022-ի հունվարի 1-ից հայտարարատու պաշտոնատար անձանց համար պարտադիր է դարձել ծախսերի մասին տվյալների հայտարարագրումը, եթե դրանց միանվագ արժեքը գերազանցում է 2 միլիոն դրամը կամ դրան համարժեք արտարժույթը, կամ նույն տեսակի ծախսերի հանրագումարը գերազանցում է 3 միլիոն դրամը։ Կան պատգամավորներ, որոնք հայտարարագրել են նաև վերը նշված գումարը չգերազանցող որոշ ծախսեր։

Պատգամավորները գումար են ծախսել դիցուք՝  անշարժ գույքի վերանորոգման համար։ Այսպես, «Քաղաքացիական պայմանագիր» խմբակցության պատգամավոր Գուրգեն Արսենյանը ծախսել է 25 միլիոն դրամ՝ անշարժ գույքի վերանորոգման համար:

Ջերմուկի համայնքապետ Վահագն Արսենյանը հայտարարագրել է 118,000,000.00 դրամի ծախս, բացի այդ, անշարժ գույքի վերանորոգման համար կատարված ծախսերը կազմել են 60,000.00 ԱՄՆ դոլար և 3,878,414.00 դրամ,  հանգստի համար կատարված ծախսերը կազմել են 15,000,000.00 ՀՀ դրամ:

ՔՊ-ական մեկ ուրիշ պատգամավոր՝ Արմեն Խաչատրյանը, հայտարարագրել է 50 հազար դոլար այլ ծախսեր։

ՔՊ-ականներից ծախսերի հայտարարագիր է ներկայացրել Արսեն Թորոսյանը: Նա, մասնավորապես, նշել է 17,750,000.00 ՀՀ դրամի հասնող ծախս, ծախսի տեսակն էլ՝  2 մլն ՀՀ դրամը կամ դրան համարժեք արտարժույթը գերազանցող այլ միանվագ ծախսեր:

«Քաղաքացիական պայմանագիր» խմբակցությունից Վահագն Հովակիմյանը որպես այլ ծախս է հայտարարագրել 5 միլիոն դրամ։

«Քաղաքացիական պայմանագիր» խմբակցությունից պատգամավորներ Զարուհի Բաթոյանը շարժական կամ անշարժ գույքի վարձակալության համար ծախսել է 965 հազար, իսկ Արթուր Հովհաննիսյանը՝ 1,2 միլիոն :

Ինչպես տեսնում ենք՝ չնայած երկրում տիրող սոցիալական լարված իրավիճակին, չնայած այն հանգամանքին, որ շարքային քաղաքացիները հիմնականում ի վիճակի չեն բավարարել անգամ իրենց տարրական սոցիալական կարիքները՝ հեղափոխական պաշտոնյաների մոտ կյանքը եռում է: Նրանք մեկնում են հանգստի, գնում են թանկարժեք իրեր, անշարժ և շարժական գույք են վարձակալում: Սակայն, եթե նայենք այս պաշտոնյաների մեծամասնության հայտարարագրերը պաշտոնները ստանձնելու օրվա դրությամբ, ակնհայտ կդառնա, որ վերջիններս նման ճոխություններ իրենց չէին կարող թույլ տալ: Ըստ էության, եթե հեղափոխությունը իսկապես հանրության մի հատվածի կյանքը փոխել է դեպի լավը, ապա այդ հատվածը անկասկած հենց ՔՊ-ական պաշտոնյաների էլիտար կաստան է..