Ռուսաստանում դարպասապահին հեռացրել են մատնահարդարման պատճառով

Ռուսական «Իրկուտսկ» ֆուտբոլային ակումբի ղեկավարությունը վառ մատնահարդարման պատճառով հեռացրել է դարպասապահ Նիկիտա Լոբուսովին՝ «տղամարդիկ պետք է տղամարդ լինեն» խոսքերով։ Համապատասխան հայտարարությունը հայտնվել է VKontakte-ի թիմի պաշտոնական էջում։

Հայտնի է, որ 20-ամյա Նիկիտա Լոբուսովը հեռացվել է մարզումներից և հանդիպումներից՝ եղունգների վարդագույն լաքով խաղադաշտ դուրս գալու պատճառով։ «Մենք հավատում ենք, որ տղամարդիկ պետք է պարզապես տղամարդ լինեն: Իսկ խաղացողները պետք է առաջին հերթին մտածեն, թե ինչպես հաղթանակ պարգևեն թիմին, այլ ոչ թե` ինչպես ինքնարտահայտվեն։ Եթե ​​մարզիկը ցանկանում է աչքի ընկնել, ապա դա պետք է անի թույլատրվածի սահմաններում»,- ասվում է գրառման մեջ։

Հրատարակությունը նշում է նաև, որ այս մրցաշրջանում Լոբուսովին մի քանի հնարավորություն է տրվել՝ դրսևորվելու հանդիպումներում, սակայն նա չի կարողացել ինչպես հարկն է պայքարել մեկնարկային կազմում տեղի համար։