Rolling Stones-ի համերգի տոմսերի աննախադեպ վաճառքը

Լոնդոնում կայանալիք Rolling Stones լեգենդար ռոք խմբի հոբելյանական համերգի տոմսերի արժեքը հասնում է 25.000 ԱՄՆ դոլարի։ Տոմսերը լայնածավալ վաճառքի են հանվել ուրբաթ օրվանից։ Սակայն հանրահայտ խմբի ելույթի պահանջարկը այնքան մեծ է եղել, որ 40.000 տոմս վաճառվել է հաշված րոպեներում, հայտնում է itar-tass.com-ը։

Ըստ օնլայն-վաճառքի փորձագետների տվյալների՝ 3 րոպեում Rolling Stones-ի երկրպագուները սպառել են ամենաէժան տոմսերը, որոնք արժեին գրեթե 150 ԱՄՆ դոլար, իսկ ահա 4 րոպե անց ավարտվել են նաև 600 ԱՄՆ դոլար արժողությամբ VIP տեղերը։ 

Այս իրարանցումը կարելի է հասկանալ, քանի որ համերգի մասին հայտարարելուց ընդամենը մի քանի ժամ անց ամբողջ աշխարհի երկրպագուներից ստացվել է ավելի քան 1 մլն պատվեր։

Այժմ բացահայտվել է նաև այն, որ տոմսերի գնորդներից ոչ բոլորն են դա արել պարզապես խմբի երկրպագու լինելու պատճառով։ Բանն այն է, որ պաշտոնական վաճառքի մեկնարկից անմիջապես հետո՝ տոմսերի մի որոշակի մաս կայքերում հայտվեց վերավաճառքի՝ շատ ավելի բարձր գնով, մոտավորապես 10 անգամ նախնական գնից ավելի թանկ։ 

Հիշեցնենք, որ լեգենդար քառյակի լոնդոնյան համերգները կկայանան նոյեմբերի 25-ին և 29-ին։