Բացվեց Հայ բարերարների ճեմուղին

Հոկտեմբերի 20-ին Երևանի Օղակաձև զբոսայգում (Մ. Նալբանդյանի արձանի հարևանությամբ) հանդիսավոր արարողությամբ բացվեց Հայ բարերարների ճեմուղին:

ՀՀ սփյուռքի նախարարության նախաձեռնությամբ Օղակաձև զբոսայգում կանգնեցվել են հայ մեծ բարերարներ Պողոս Նուպարի, Ալեքսանդր Մանթաշյանի, Ալեք Մանուկյանի, Գալուստ Գյուլբենկյանի, Միքայել Արամյանցի, Հովհաննես Լազարյանի կիսանդրիներով կոթողները, իսկ Բարերարների այգու մուտքի մոտ՝ բարերարության հավաքական կերպարը խորհրդանշող հուշարձանը:

Ճեմուղու բացման հանդիսավոր արարողությանը ներկա էին բարձրաստիճան հյուրեր Հայաստանից և Սփյուռքից:

ՀՀ սփյուռքի նախարար Հրանուշ Հակոբյանը, ողջույնի խոսքում նշանավորելով ձեռնարկը, ընդգծեց. «Հայ մեծ բարերարների ճեմուղու բացումը խիստ կարևոր ազգային ձեռնարկ է, քանզի այն այսօր տուն է վերադարձրել հայտնի հայորդիներին: Այս ձեռնարկը նաև հայրենասիրական է, քանզի նպաստեց Հայրենիք-Սփյուռք կապերի ամրապնդմանը: Մենք հպարտացել և հպարտանալու ենք մեր մեծ բարերարներով եւ իրենց կատարած աշխատանքով»:

Մայր Աթոռ Սուրբ Էջմիածնի ուղերձը հղեց Անուշավան եպիսկոպոս Ժամկոչյանը. «Այս ճեմուղին կօգնի հաղորդակից լինել մեր մեծ բարերարներին: Բարերարների հանդեպ սիրո, հարգանքի ձգտումը պետք է միշտ վառ մնա ազգի հոգում»,- ասաց Ժամկոչյանը:

Հայկական բարեգործական ընդհանուր միության նախագահ Պերճ Սեդրակյանը մեծ հուզմունքով իր շնորհակալությունը հայտնեց նախաձեռնության հեղինակներին՝ ընդգծելով, որ իր ղեկավարած կառույցի համար առաջնայինը միշտ եղել և շարունակում են մնալ Հայրենիքը և նրա բարօրությունը:

Ճեմուղու բացման խորհրդանշական ժապավենը կտրեցին ՀՀ սփյուռքի նախարարն ու Երևանի քաղաքապետը, Գալուստ Գյուլբենկյան և Ալեք Մանուկյան դպրոցների բարձր առաջադիմություն ցուցաբերած աշակերտները:

Այնուհետև բարձրաստիճան հյուրերը ՀՀ Զինված ուժերի փողային նվագախումբի և «Զորական» երգի համույթի կատարումների ուղեկցությամբ շրջեցին ճեմուղում՝ ծաղիկներ դնելով ու խոնարհվելով հայ մեծերի գործի առջև: