Գիտաժողով՝ նվիրված Լ. Օրբելու 130 և Հ. Օրբելու 125 ամյակներին

Վերջին լուրեր 23 Հոկտեմբեր, 2012 2:56

Ս. թ. սեպտեմբերի 29-ից հոկտեմբերի 5-ը ՌԴ Սանկտ Պետերբուրգ քաղաքում տեղի է ունեցել «Օրբելի եղբայրները և ժամանակակից գիտության զարգացումը» խորագրով գիտաժողովը, որը նվիրված էր ակադեմիկոսներ Լ. Օրբելու 130 և Հ. Օրբելու 125-ամյա հոբելյաններին: Գիտաժողովը համանախագահում էին Ի. Սեչենովի անվան էվոլյուցիոն ֆիզիոլոգիայի և բիոքիմիայի ինստիտուտի տնօրեն, ակադեմիկոս Ն. Վեսյոլկինը և Պետական Էրմիտաժի տնօրեն Մ. Պիոտրովսկին: Գիտաժողովին մասնակցում էին Ռուսաստանի Դաշնության և Հայաստանի Հանրապետության մտավորականության ներկայացուցիչներ, ինչպես նաև ռուսաստանյան առաջատար հեռուստաալիքների լրագրողներ: Երկօրյա գիտաժողովի շրջանակներում ներկայացվել է ավելի քան 30 զեկույց:

Հայաստանից գիտաժողովին մասնակցել է Օրբելի եղբայրների տուն-թանգարանի տնօրեն Մարինե Բունիաթյանն, ով հանդես է եկել «Օրբելի եղբայրների թանգարանը Հայաստանում» խորագիրը կրող զեկուցումով, որն ուղեկցվել է թանգարանի ցուցասրահներում ներկայացված լուսանկարների ցուցադրությամբ: Մարինե Բունիաթյանը գիտաժողովի մասնակիցներին ներկայացրել է նաև 2012 թ. տուն-թանգարանի տպագրած «Լևոն Օրբելի» և «Հովսեփ Օրբելի» գրքերը, ինչպես նաև պետական պատվերով հրատարակված «Էջեր Օրբելի ընտանիքի կյանքից» նամականին և նվիրել գիտաժողովի մասնակիցներին: Գիտաժողովի օրերին Օրբելի եղբայրների տուն-թանգարանի տնօրինությունն իրականացրել է նաև գիտահավաքչական աշխատանքներ: Այս համատեքստում, Հ. Օրբելու հարսի և ծոռան կողմից թանգարանին է հանձնվել երկու ճամպրուկ նյութ, որոնք մինչ տարեվերջ կտեղափոխվեն Հայաստան: Լ. Օրբելու թոռ' Աբգար Օրբելին թանգարանին նվիրել է իր պապի ձեռագիր աշխատանքները, բնօրինակ լուսանկարները և նամակները: ՌԴ ԳԱ արևելագիտության ինստիտուտից ձեռք են բերվել Հ. Օրբելու աշխատասենյակի ցուցավահանակը, 1942 թ. կարմիր բանակայինների կողմից Հ. Օրբելուն հանձնած հուշանվերը և նրա սեղանի լուսամփոփը: Իսկ Ռուբեն Օրբելու անվան ջրասուզական գործի պատմության և զարգացման ուսումնասիրման ընկերության նախագահ Ա. Սլեդկովը թանգարանին հանձնել է Ռ. Օրբելուն վերաբերող արխիվային նյութեր և նրան նվիրված «Ակնարկ ջրասուզակային գործի պատմությունից» գրքի առաջին հատորը, Էրմիտաժի տնօրեն Մ. Պիոտրովսկին՝ հայտնի ռուս նկարիչ Վերեյսկու հեղինակած Հ. Օրբելու երկու գծանկարները: Առաջիկայում Սանկտ Պետերբուրգի ռազմաբժշկական թանգարանի և ՌԴ ԳԱ արևելագիտության արխիվի ղեկավարությանն Օրբելու թանգարանին կհանձնի Լ. Օրբելուն վերաբերող բոլոր արխիվային նյութերի կրկնօրինակները և կրկնվող նյութերը: