Սելենա Գոմեսը խնդրել է այլևս չահաբեկել Հեյլի Բիբերին, ով սկսել է մահվան սպառնալիքներ ստանալ

Դերասանուհի և երգչուհի Սելենա Գոմեսը դիմել է հետևորդներին՝ խնդրելով դադարեցնել սպառնալիքները մոդել Հեյլի Բիբերի հասցեին։ Գոմեսը համապատասխան հայտարարությունն արել է Instagram-ում։

Սելենա Գոմեսի, Հեյլի Բիբերի և Քայլի Ջենների շուրջ սկանդալը բորբոքվեց անցյալ ամիս։ Սելենան հետևորդներին ասել էր, որ պատահաբար չափն անցել է հոնքերի լամինացիա անելիս։ Քիչ հետո Քայլին լուսանկար էր հրապարակել Հեյլիի հոնքերով և «Դա պատահականությո՞ւն էր» մակագրությամբ։ Սոցցանցերի օգտատերերը ենթադրել էին, որ այս կերպ Քայլին ծաղրել է Սելենային։ Կրակի վրա յուղ լցրեց այն փաստը, որ Հեյլին ամուսնացած է Սելենայի նախկին ընկերոջ՝ Ջասթին Բիբերի հետ։

Արդյունքում Քայլին և Հեյլին կորցրին Instagram-ի հետևորդներ, իսկ Սելենան դարձավ սոցցանցում ամենապոպուլյար աղջիկը՝ ավելի քան 400 միլիոն հետևորդով։ Կոսմետիկ բրենդերը՝ Kylie Cosmetics և Rhode Skin, որոնք պատկանում են համապատասխանաբար Ջեններին և Բիբերին, բոյկոտվել են։ Rare Beauty ապրանքանիշի վաճառքը, որի սեփականատերը Գոմեսն է, ընդհակառակը, աճել է։ Սակայն բանն այսքանով չավարտվեց։

Հեյլին սկսել է մահվան սպառնալիքներ ստանալ, որոնց մասին նա հայտնել է Սելենային։

«Հեյլի Բիբերը կապվեց ինձ հետ և ասաց, որ մահվան սպառնալիքներ է ստացել։ Սա այն չէ, ինչին աջակցում եմ: Ոչ ոք չպետք է զգա ատելություն և ահաբեկում: Ես միշտ պաշտպանել եմ բարությունը և իսկապես ուզում եմ, որ այդ ամենը դադարեցվի»,- ասել է Գոմեսը: