Իսրայելում վարչապետ Նեթանյահուի դեմ բողոքի ցույցին ավելի քան 100 000 ցուցարար է մասնակցել (լուսանկարներ, տեսանյութ)

Իսրայելի ոստիկանությունը ցրել է Թել Ավիվի արևելյան Այալոն մայրուղու վրա ժամեր շարունակ տեղի ունեցող հակակառավարական ինքնաբուխ ցույցը, որին 100 000 ցուցարար է մասնակցել: Ցույցը ցրելու ժամանակ օգտագործվել են ջրցան մեքենաներ, ներգրավվել են հեծյալ ոստիկաններ, հաղորդում է իսրայելական 13 հեռուստաալիքը։

Ցուցարարները մի քանի ժամով փակել են մայրուղին, կրակ են վառել և պատրաստվել են այդտեղ մնալ առնվազն մինչև առավոտ։ Որոշ ակտիվիստներ սկսել են վրաններ տեղադրել ճանապարհի վրա։ Ցուցարարների ամենամեծ կենտրոնացման պահին ցույցերի թիվը, Crowd Solutions մասնավոր ընկերության գնահատականների համաձայն, հասել է 105 հազար մարդու։

Ժամը 03:00-ին (Երևանի ժամանակով՝ 04:00-ին) ոստիկանները, որոնք մինչ այդ պահը չեն միջամտել տեղի ունեցողին, սկսել են հետ մղել ցուցարարներին, որոնց մեծ մասն արդեն այդ ժամանակ ցրվել է։ Որոշ ցուցարարներ սկսել են դիմադրել պահակախմբին, տեղի են ունեցել բախումներ, ոստիկանությունը սկսել է ակտիվորեն կիրառել ջրցան մեքենաներ։

Իսրայելում մարտի 26-ի երեկոյան սկսված ինքնաբուխ բողոքի ցույցերի պատճառը Նեթանյահուի կողմից հայտարարված երկրի պաշտպանության նախարար Յոավ Գալանտի հրաժարականն է։ Նա այս որոշումը կայացրել է այն բանից հետո, երբ մեկ օր առաջ Գալանտը բացահայտորեն հանդես է եկել դատաիրավական բարեփոխումների կասեցման օգտին, որը խթանում է իշխող կոալիցիան և որը առաջացրել է ընդդիմության զանգվածային բողոքը։

Կառավարության ընդդիմախոսների կարծիքով՝ բարեփոխումը, որը ենթադրում է Գերագույն դատարանի լիազորությունների սահմանափակում և դատավորների ընտրության նկատմամբ գործադիր իշխանությանը վերահսկողություն տրամադրելը, կխաթարի Իսրայելի պետականության ժողովրդավարական հիմքերը։ Նեթանյահուն պնդում է, որ այս բարեփոխումը կհավասարակշռի իշխանության բոլոր ճյուղերի լիազորությունները և երկրի քաղաքական համակարգը  կդարձնի ավելի ժողովրդավարական: