Պետք է ուղիղ ասել՝ մենք ապրում ենք անվտանգության ճգնաժամ. Նիկոլ Փաշինյան

ՀՀ վարչապետ Նիկոլ Փաշինյանն ԱԺ-ում հայտարարեց, որ Հայաստանն ապրում է անվտանգության ճգնաժամ, սակայն այդ ճգնաժամը ստեղծվել է շատ ավելի վաղ:

«Իսկ եթե ամեն ինչ այսքան լավ է, ինչո՞ւմ է խնդիրը: Խնդիրն այն է, որ մարդիկ տագնապած են, կսկիծ ու դառնություն ունեն իրենց մեջ: Մեծ անորոշություններ կան: Եվ պետք է ուղիղ ասել, որ մենք ապրում ենք անվտանգության ճգնաժամ: Այո, դա պետք է ասել, և սրա պատասխանատվությունից ոչ ոք չի պատրաստվում հրաժարվել»,- նշեց Փաշինյանը:

Նա, անդրադառնալով ընդդիմության կոչերին, որ իշխանությունը հեռանա, հայտարարեց, թե իշխանությունը հեռացել է, և շատ ներկաներ ԱԺ-ում նստած են իշխանության հեռացման շնորհիվ:

«Ձեր տեղն ուրիշ մարդիկ էին նստած: Որ մենք չհեռանայինք, դուք այստեղ ի՞նչ էիք անում: Մենք հեռացել ենք, բայց չենք փախել: Մենք ժողովրդին ասել ենք՝ սա է, թող ընդդիմությունն էլ գա ասի, թե ինչը ոնց է, մենք էլ մեր տեսակետն ասենք, դուք էլ եղեք դատավոր: Ժողովուրդը դատավոր է եղել»,-ասաց Փաշինյանը:

Վարչապետը անդրադարձել է նաև ընդդիմության քննադատությանը, թե եղած գումարներն արժի ծախսել անվտանգային համակարգի, ոչ թե փողոցների ասֆալտապատման վրա. «Սրա մեջ տրամաբանություն կա, բայց ամբողջական չէ, որովհետև ասֆալտը նույնպես անվտանգային նշանակություն ունի, ասֆալտը նաև զորքի շարժունակությունն է, անվտանգային համակարգի շարժունակությունն է»։

Նա նշել է, թե եղած գումարներն օբյեկտիվ կամ սուբյեկտիվ պատճառներով հնարավոր չէ լիարժեք ծախսել. «Երբ դուք էիք իշխանություն, դուք էիք լավ տիրապետում, բացառված էր, որ ընդդիմությունն ավելի լավ տիրապետի, այսօր մենք ենք կառավարություն, մենք ենք ավելի լավ տիրապետում։ Այստեղ վիճելու բան չկա։ Եվ երբ ասում եմ անվտանգության ճգնաժամ, պետք է հասկանալ՝ էդ ինչ ճգնաժամ է։ Սա մեր անկախության օրոք ստեղծված անվտանգային ճարտարապետության ճգնաժամ է։ Սա 2020թ. չի ստեղծվել, այլ՝ ավելի շուտ։ Տարեթվեր կարող ենք նշել։ Հոկտեմբերի 27-ն էլ նշվեց։ Սա էլ անվտանգային մեր ճարտարապետության խորքային և լրջագույն ճգնաժամի արդյունք էր»։ 

Անդրադառնալով հարցին, թե արդյոք այս իշխանություն է ստեղծել անվտանգային համակարգի այդ ճգնաժամը՝ Փաշինյանը առաջարկեց հետ գնալ 2011 թվական:

Դիմելով նախկին իշխանությանը՝ նա ասաց. «Շատ լավ դիվանագիտություն էիք վարում, շատ լավ առաջնորդ էիք: Բա այդ ո՞նց եղավ, որ մեր ռազմավարական դաշնակիցը 3 մլրդի զենքի գործարք կնքեց Ադրբեջանի հետ, դուք էլ գնացիք հեռվից, Արգենտինայում, թե Բրազիլիայում, դրա հետ կապված մտահոգություն հայտնեցինք»:

Ըստ նրա՝ այդ ճգնաժամը եղել է 2016-ին, նաև՝ դրանից առաջ: