Դավիթ Հովհաննիսյանը հռչակվեց ծանրամարտի Եվրոպայի չեմպիոն

Հայաստանը հերթական մեդալները նվաճեց Երևանի Կարեն Դեմիրճյանի անվան մարզահամերգային համալիրում շարունակվող ծանրամարտի Եվրոպայի առաջնությունում:

92 կգ քաշային կարգի А խմբում Դավիթ Հովհաննիսյանը երկամարտի 377 կգ (172+205) արդյունքով հռչակվեց Եվրոպայի չեմպիոն, իսկ Արա Աղանյանը 364 կգ (165+199) արդյունքով զբաղեցրեց երկրորդ տեղը: Բրոնզե մեդալ նվաճեց իտալացի Քրիստիանո Ջուզեպեն, որը երկարամարտում գրանցեց 363 կգ արդյունքը:

Դավիթ Հովհաննիսյանը պոկում վարժությունում հաջողությամբ բարձրացրեց 165, 170, 172 կգ և փոքր ոսկե մեդալ նվաճեց: Արա Աղանյանը հաջողեց միայն առաջին մոտեցումն (165 կգ) ու նվաճեց փոքր բրոնզե մեդալ:

Հրում վարժությունում Հովհաննիսյանը բարձրացրեց 200 կգ, ապա 205 կգ, իսկ երրորդ մոտեցումից հրաժարվեց: Արա Աղանյանը հրում վարժությունում կատարեց միայն առաջին մոտեցումը (199 կգ), իսկ երկրորդ և երրորդ մոտեցումներից հրաժարվեց:

Հիշեցնենք, որ երևանյան ԵԱ-ում Հայաստանն ավելի վաղ 5 մեդալ է նվաճել երկամարտում։ Մրցումային նախորդ օրերի ընթացքում Գոռ Սահակյանը (67 կգ) հռչակվել է Եվրոպայի չեմպիոն, Տաթև Հակոբյանը (76 կգ) և Անդրանիկ Կարապետյանը  (89 կգ)   դարծել են արծաթե մեդալակիր, իսկ Ռաֆիկ Հարությունյանը (81 կգ) և Իզաբելա Յայլյանը (55 կգ) նվաճել են բրոնզե մեդալ։

Տղամարդկանց Հայաստանի հավաքականի կազմում մեդալների համար կպայքարեն նաև Գարիկ Կարապետյանը (102 կգ), Սամվել Գասպարյանը և Պետրոս Պետրոսյանը (երկուսն էլ՝ 109 կգ), Սիմոն Մարտիրոսյանը և Վարազդատ Լալայանը (երկուսն էլ՝ +109 կգ)։
Կանանց Հայաստանի հավաքականի կազմում մրցահարթակ դուրս կգան նաև Մարգարիտա Առաքելյանը և Հռիփսիմե Խուրշուդյանը (երկուսն էլ՝ 87 կգ), Ջուլիետա Ավանեսյանը (+87 կգ):