Ծանրամարտի ԵԱ․ Հայաստանը 3 մասնակից ունի վերջին օրը

Երեւանում ավարտին մոտեցող ծանրամարտի Եվրոպայի առաջնության վերջին՝ 9-րդ  մրցումային օրը Հայաստանն ունի 3 մասնակից:

Ապրիլի 23-ին կանանց +87 կգ քաշայիների A խմբում մրցահարթակ դուրս կգա Ջուլիետա Ավանեսյան: Նրա նախնական հայտը երկամարտում՝220 կգ է: Այս քաշային երկամարտի 255 կգ նախնական հայտով ֆավորիտը Վրաստանի ներկայացուցիչ Անաստասիա Հոթֆրիդն է:

Կանանց +87 կգ քաշային A խմբի պայքարը կմեկնարկի 13:30-ին:

Վերջինը պայքարի մեջ կմտնեն տղամարդկանց +109 կգ քաշայինների A խումբը: Հայաստանն այս քաշային կարգում ունի երկու ներկայացուցիչ՝ աշխարհի փոխչեմպիոն եւ Եվրոպայի բրոնզե մեդալակիր  Վարազդատ Լալայան եւ 109 կգ քաշային կարգում կրկնակի օլիմպիական փոխչեմպիոն, աշխարհի եւ Եվրոպայի կրկնակի չեմպիոն Սիմոն Մարտիրոսյան:

Վարազդատ Լալայանի նախնական հայտը երկամարտում 450 կգ է: Սիմոն Մարտիրոսյանը հայտավորվել է 435 կգ-ով:

Նշենք, որ կրկնակի օլիմպիական փոխչեմպիոն Սիմոն Մարտիրոսյանը փոխել է քաշային կարգը, քանի որ 109 կգ քաշային կարգն այլեւս օլիմպիական չի: Այս քաշային կարգում նախկինում պայքարում էր օլիմպիական փոխչեմպիոն Գոռ Մինասյանը, որն այժմ հանդես է գալիս Բահրեյնի հավաքականի կազմում:

Այս քաշային կարգում ֆավորիտը շարունակում է մնալ կրկնակի օլիմպիական չեմպիոն, 6-ակի աշխարհի եւ Եվրոպայի չեմպիոն, վրացի Լաշա Տալախաձեն:

Նրա նախնական հայտը երկամարտում 465 կգ է: Հայ ծանրորդների միակ մրցակիցը հենց Լաշա Տալախաձեն է:

Տղամարդանց +109 կգ քաշայինների A խմբի պայքարը կմեկնարկի 16:00-ին:

Ընդհանուր մեդալային հաշվարկում Հայաստանն այդ պահին առաջին տեղում է՝ երկամարտի 4 ոսկե, 3 արծաթե, 4 բրոնզե մեդալով։

Երկամարտում Եվրոպայի չեմպիոն են դարձել Գոռ Սահակյանը (67 կգ),  Դավիթ Հովհաննիսյանը (92), Գարիկ Կարապետյանը (102 կգ) եւ Սամվել Գասպարյանը (109 կգ)։

Երկրորդ տեղում է Ռումինիան՝ 3 ոսկե, 1 արծաթե, 1 բրոնզե։

Լավագույն եռյակը եզրափակում է Ուկրաինան՝ 2 ոսկե, 3 արծաթե, 2 բրոնզե։

Ծանրամարտի Եվրոպայի առաջնությունը վարկանիշային է Փարիզ-2024 Օլիմպիական խաղերի համար:

Փարիզ-2024-ի օլիմպիական քաշային կարգերն են՝ 61 կգ, 73 կգ , 89 կգ, 102 կգ , +102 կգ: