Նիկոլը հուշում է իրեն հեռացնելու հանրային ռեսուրսը. Վահե Հովհաննիսյան

Եթե բոլոր նրանք, ում Նիկոլը մերժում է, կարողանան կազմել միասնական ճիշտ օրակարգ, շատ արագ կկարողանան կոնսոլիդացնել հանրության 90 տոկոսին և միակ մերժվածը կլինի Նիկոլը։ Այս մասին գրել է «Այլընտրանքային նախագծեր» խմբի անդամ Վահե Հովհաննիսյանը:

«Նիկոլը հուշում է իրեն հեռացնելու հանրային ռեսուրսը:

Նախորդ անգամ գրել էի, որ Նիկոլը հուշում է իրեն հեռացնելու եղանակը։

Հաջորդ օրերին նա շարունակեց թեման, և հիմա էլ հուշում է իրեն հեռացնելու ռեսուրսը։ Սա աննորմալ վիճակ է, երբ իշխանության ղեկավարը նաև հակաիշխանական մոդերատորի դերակատարումն է ստանձնում, բայց մեր ողջ կյանքն է հիմա աննորմալ։ 

Կետ առ կետ արձանագրենք, թե ում է այսօր մերժում Նիկոլը.

- Հայ առաքելական եկեղեցի

- Զոհերի ծնողներ

- Էլիտաներ

- Ազգային արժեքներ կրող հանրություն

- Հանրային լուրջ գործիչներ

- Քաղաքական ընդդիմություն

- Հեղինակավոր զինվորականներ, հրամանատարներ

- Բուհական համայնք

- Արտադրող, արտահանող գործարարներ 

- Անկախ գյուղացիական տնտեսություններ

- Հարյուր հազարավորներին, որոնք տարբեր պատճառներով դեռևս չեն հանրայնացնում իրենց ընդվզումը, սակայն արդեն գտնվում են «Նիկոլի հակառակ կողմում»։

Եվ իհարկե կա մյուս կողմը, թե ում այլևս չի´ մերժում Նիկոլը.

- Հայտնի կասկադյան միջադեպից հետո Ալենին «պարոն Սիմոնյան»-ով դիմող ընդդիմադիրներին
- ԱԺ-ում քաղաքացիական կեցվածք դրսևորած կին պատգամավորներին քաշքշելուց հետո նույն դահլիճում «կառուցողականու հանդուժողական» գծի կողմնակիցներին

- Երկրի համար այս կրիտիկական պահին սեփական շահի համար իշխանության հետ գործարքի գնացողներին, և այլն։

Սակայն այս երկու խմբերի միջև այսօր առավել կարևորն, իհարկե, առաջինն է, և իմ ասածի առանցքը դա է։ Եթե բոլոր նրանք, ում Նիկոլը մերժում է, կարողանան կազմել միասնական ճիշտ օրակարգ, շատ արագ կկարողանան կոնսոլիդացնել հանրության 90 տոկոսին և միակ մերժվածը կլինի Նիկոլը։ Եվ հենց սրա վրա է պետք կենտրոնանալ, ու համախմբումը տանել հենց դրական օրակարգով»։