Գիտեմ ՀՀԿ խմբակցությունում բաժանված տեքստերը որտեղ են գրվում. Ն Զոհրաբյան

ՄԻԱԿ քարտուղար, ԱԺ ՀՀԿ խմբակցության պատգամավոր Նաիրա Կարապետյանը անդրադարձել էր Նաիրա Զոհրաբյանի եւ Վահե Հովհաննիսյանի տարածած հայտարարությունը՝ ի պատասխան Է. Շարմազանովի՝ Սևրի պայմանագրի վերաբերյալ արված դատողությունների: Նաիրա Կարապետյանը ԲՀԿ-ական պատգամավորների հայտարարությունը որակել է անբովանդակ եւ երկու դիտարկում արել:

Yerkir.am-ի հետ զրույցում, անդրադառնալով ՀՀԿ-ի պատգամավորի այս հայտարարությանը, ԱԺ ԲՀԿ խմբակցության քարտուղար Նաիրա Զոհրաբյանը հայտարարեց. «Ես ինձ թույլ չեմ տա ներքաշվել այս էժանագին երկխոսության մեջ, հատկապես' այն մարդկանց հետ, ում համար տեքստեր են գրում, որ արտասանեն ԱԺ հայտարարությունների ժամին, մարդիկ, ում փոխարեն հայտարարություններ են գրում եւ պարտադրում նման հայտարարություններով հանդես գալ: Գիտեք' այդ մարդիկ իրականում մեղք չունեն: Ես հրաշալի գիտեմ, թե ԱԺ հայտարարությունների ժամին նրանց խմբակցությունում բաժանված տեքստերը որտեղ են գրվում, ով է գրում, գիտեմ, որ նրանցից շատերը, հաճախ համաձայն չլինելով այդ տեքստերի հետ, ստիպված են լինում դրանք արտասանել: Նրանք մեղավոր չեն, եւ անհրաժեշտության դեպքում ես կպատասխանեմ ոչ թե ընդամենը կատարողներին, այլ այդ անբովանդակ, անիմաստ տեքստերը երկնողներին: Իմ արժանապատվությունից ցածր է կատարողների հետ երկխոսության մեջ մտնելը»: