Բաղրամյան 26-ի հերթական զավեշտը

Հայաստանի Հանրապետությունում գործող գերատեսչություններից շատերը լրագրողների հետ հաղորդակցվում են պաշտոնական հարցում ուղարկելու միջոցով:

Վերջիններիս լրատվական ծառայություններից որոշները լրագրողների կողմից հնչեցված հարցերին պատասխանում են այս կերպ. «Գրավոր հարցում ուղարկե՛ք և հինգ աշխատանքային օրվա ընթացքում կպատասխանենք»: Նման դեպքի ենք ականատես եղել, երբ ցանկացել ենք տեղեկություն ստանալ Քրեակատարողական հիմնարկի լրատվական ծառայությունից, Երևանի քաղաքապետարանից, Պետեկամուտների կոմիտեից: Իհարկե, սրանք վերաբերում են ոչ բոլոր հարցերին, տրվում են նաև բանավոր պատասխաններ:

Նման պատկեր է նաև նախագահական նստավայրում: Այստեղ գործում է միայն գրավոր հարցում ուղարկելու մեխանիզմը:

Անահավանական իրավիճակի ենք հանդիպել ս.թ հոկտեմբերի 27-ին, երբ Լուրեր.com լրատվական կայքը փորձեց նախագահական նստավայրի լրատվական ծառայությունից տեղեկանալ, թե այդ օրը որ ժամին է ՀՀ նախագահ Սերժ Սարգսյանն այցելելու Եռաբլուր հարգանքի տուրք մատուցելու: Հարցը տալիս ստացանք հետևյալ պատասխանը. «Պարոն Արզումանյանն այստեղ չէ, պետք է գրավոր ուղարկեք հարցը»: Լրագրողի այն դիտարկմանը` միայն ժամը նշելու համար պետք է գրավոր հարցո՞ւմ ուղարկել, ստացանք նույն պախատասխանը:

Նշենք նաև, որ որոշ ժամանակ առաջ Լուրեր.com-ը գրավոր հարցում էր ուղարկել նախագահական նստավայր՝ «Ժառանգություն» կուսակցության առաջնորդ Րաֆֆի Հովհաննիսյանի նամակի վերաբերյալ, որը նա ուղարկել էր Սերժ Սարգսյանին:
Այդ պարագայում էլ հինգ աշխատանքային օրը փոխարինվեց անհայտ ժամկետով:

Ստացվում է, որ տարբեր գերատեսչությունների ու պաշտոնյաների լրատվական ծառայություններն իրենք են սահմանում իրենց գործելաոճը լրատվամիջոցների հետ այն պարագայում, երբ բոլորի համար պետք է սահմանված լինի մեկ և հստակ աշխատելաոճ: