Այս օրը տեղի ունեցավ Ամերիկայի գլխավոր խորհրդանիշ Ազատության արձանի բացումը (տեսանյութ)

1886թ.հոկտեմբերի 28-ին տեղի ունեցավ Ազատության արձանի հանդիսավոր բացումը` նախագահ Գրովեր Քլիվլենդի մասնակցությամբ:

Ազատության արձանը ԱՄՆ-ում և աշխարհում քանդակագործության ամենահայտնի կոթողներից է, որին հաճախ անվանում են «Նյու-Յորքի և ԱՄՆ-ի սիմվոլ», «Ազատության և դեմոկրատիայի սիմվոլ», «Լեդի Ազատություն»: Արձանը տեղակայված է Լիբերթի Այլենդի վրա, Նյու-Յորքի թաղամաս Մանհեթնից 3 կմ դեպի հարավ-արևմուտք: Աստվածուհին մի ոտքով կանգնած է կոտրված շղթաների վրա, աջ ձեռքում ջահ է, ձախում' «հուլիսի 4, 1776 թ.» փորագրությամբ տախտակ' անկախության դեկլարացիայի ստորագրման տարեթիվը: Սովորաբար լաստանավով ժամանող այցելուները բարձրանում են 356 աստիճան մինչև արձանի պսակը կամ 192 աստիճան մինչև պատվանդանի բարձրակետը: Պսակում տեղակայված են 25 պատուհաններ, որոնք խորհրդանշում են աշխարը լուսավորող երկրի թանկագին քարերն ու երկնային շողերը: Յոթ շողերը խորհրդանշում են յոթ ծովերն ու յոթ մայրցամանքները ըստ ժամանակակից արևմտյան աշխարհագրության ավանդության: Արձանի պողպատե կարկասը կշռում է 125 տոննա, 2,57 մմ հաստությամբ երեսպատման պղնձե նրբաթիթեղները' 31 տոննա: Պատվանդանի հիմքից մինչև ջահի ծայրը հեռավորությունը կազմում է 93 մետր, բուն արձանի բարձրությունը 46 մետր է: Արձանի պսակի և ջահի վրայի հարթակներից բացվում է նյույորքյան ծովածոցի համայնապատկերը: Պատվանդանում գտնվում է արձանի պատմության ցուցահանդես-թանգարանը:

Հուշակոթողը Ֆրանսիայի նվերն է ամերիկյան հեղափոխության հարյուրամյակին:Կոթողի հեղինակն է ֆրանսիացի քանդակագործ Ֆրեդերիկ Օգյուստ Բարտոլդին, ըստ ավանդության որպես բնորդուհի է ծառայել Իսահակ Զինգերի այրին' ֆրանսուհի Իզաբելլա Բոյերը:
Ազատության արձանի փոքրացված պատճենները կանգնեցված են Փարիզում, Տոկիոյում, Ռիգայում, Լվովում և այլուր: