22-ամյա երիտասարդը կարաոկեից դուրս գալուց հետո դանակահարել է իր հետ վիճողին

Այսօր՝ հոկտեմբերի 28-ին, Ոստիկանության քննչական գլխավոր վարչության Լոռու մարզի քննչական բաժնի ավագ քննիչ Էդվարդ Կարապետյանի կողմից քրեական գործ է հարուցվել ՀՀ Քրօր-ի 113 հոդվածի 2-րդ մասի 6-րդ կետի (դիտավորությամբ առողջությանը միջին ծանրության վնաս պատճառելը, որը կատարվել է խուլիգանական դրդումներով) հատկանիշներով:

Ինչպես shamshyan.com–ին հայտնում է ֆոտոլրագրող Գագիկ Շամշյանը, երեկ՝ հոկտեմբերի 27-ին, ժամը 22:00-23:00-ն ընկած ժամանակահատվածում, Վանաձորի թիվ 1 հիվանդանոց ծայրահեղ ծանր վիճակում տեղափոխվել է Լոռու մարզի Դարպաս գյուղի բնակիչ, 34-ամյա Կարեն Դոյդոռյանը: Վերջինս մարմնական վնասվածքները ստացել է ձեռքի, կրծքավանդակի, որովայնի շրջանում՝ սուր կտրող-ծակող առարկայի հարվածից:

Ոստիկանության Լոռու մարզային վարչության և Ոստիկանության Վանաձորի բաժնի օպերատիվ քննչական խումբը պարզել է, որ Կ. Դոյդոռյանը հիվանդանոց է տեղափոխվել Վանաձոր Վանյոյի թիվ 8 շենքի բակից: Պարզվել է, որ նրան դանակի մի քանի հարվածներ է հասցրել նախկինում մի քանի անգամ դատապարտված, Վանաձոր քաղաքի Կարեն Դեմիրճյան 12 շենքի բնակիչ, 22-ամյա Սլավիկ Մխիթարյանը, ով դիմել է փախուստի:

Գ. Շամշյանը հայտնում է, որ վանաձորցիներն իրեն պատմել են, որ երեկ երեկոյան դանակահարվածը մի քանի աղջիկների հետ եղել է Բելլասիմո ռեստորանի մոտ գտնվող կարաոկե ակումբում: Այդ ժամանակ Ս. Մխիթարյանը անվայել վերաբերմունք է ցուցաբերել, ինչի համար քաշքշուկ և լեզվակռիվ է տեղի ունեցել նրանց միջև: Դրանից հետո Կ. Դոյդոռյանը հեռացել է կարաոկե բարից: Արդեն Բանյոյի փողոցում նրան է մոտեցել Ս. Մխիթարյանը և փորձել է պարզաբանում ստանալ կարաոկեում կատարվածի համար, ինչից հետո իր մոտ եղած դանակով հարվածներ է հասցրել Կ. Դոյդոռյանին:

Գ. Շամշյանը հայտնում է, որ վանաձորցիները պատմել են նաև, որ Բելլասիմո օբյեկտը պատկանում է Վանաձորի քաղաքապետ Սամվել Դարբինյանի եղբոր տղային, սակայն այն վարձակալական հիմունքներով աշխատեցնում է բոլորովին այլ մարդ:

Ոստիկանությունը ձեռնարկում է օպերատիվ հետախուզական և քննչական միջոցառումներ հայտնաբերելու համար Ս. Մխիթարյանին: