«Մանչեսթեր Յունայթեդ»-ը հաղթեց 9 ֆուտբոլիստով հանդես եկող «Չելսի»-ին

Անգլիայի առաջնության 9-րդ տուրում այսօր «Չելսին» «Ստեմֆորդ Բրիջ» մարզադաշտում հյուրընկալեց «Մանչեսթեր Յունայթեդին»: Թիմերի միջև պայքարն ավարտվեց 2:3 հաշվով՝ հօգուտ մանչեսթերյան ակումբի:

Խաղի մեկնարկին Դավիդ Լուիսը ինքնագոլի հեղինակ դարձավ, ինչի շնորհիվ Ֆերգյուսոնի սաները հաշվի մեջ առաջ անցան։ Այնուհետև 12-րդ րոպեին Ռոբին վան Պերսին կրկնապատկեց հաշիվը: Առաջին խաղակեսի ավարտին՝ 44-րդ րոպեին, Խուան Մատան կրճատեց հաշվի տարբերությունը:

53-րդ րոպեին Ռամիրեսի գոլի շնորհիվ հաշիվը հավասարվեց՝ 2:2: Այնուհետև իսկական դժոխք սկսվեց «Չելսիի» համար։ Խաղի 63-րդ րոպեին դաշտից հեռացվեց «Չելսիի» պաշտպան Իվանովիչը, իսկ 5 րոպե անց արդեն Ֆերնանդո Տորեսը։ Ունենալով 2 խաղացողի առավելություն՝ հանդիպման 75-րդ րոպեին մանչեսթերցիներին հաջողվեց առաջ անցնել հաշվի մեջ՝ 3:2: Գոլի հեղինակ դարձավ Խավիեր Էրնանդեսը: Խաղի տեսանյութը կարող եք դիտել այստեղ:

Անգլիայի առաջնության մյուս խաղերում գրանցվել են հետևյալ հաշիվները.

Էվերթոն - Լիվերպուլ 2:2
Նյուքասլ - Վեստ Բրոմվիչ 2:1
Սաութհեմփթոն - Տոտենհեմ 1:2