ՀՖՖ-ն կապ է հաստատել Սպարտակի սան Ստեփան Հովհաննիսյանի հետ

Հայաստանի ֆուտբոլի ֆեդերացիայի (ՀՖՖ) ներկայացուցիչները կապ են հաստատել Մոսկվայի «Սպարտակի» սան, հարձակվող Ստեփան Հովհաննիսյանի հետ՝ նրան Հայաստանի հավաքական հրավիրելու շուրջ բանակցություններ վարելու նպատակով: Այս մասին գրում է Armsport.am-ը։

Այս մասին Match TV-ի հետ զրույցում հայտնել է ՀՖՖ Հասարակայնության հետ կապերի և լրատվության բաժնի պետ Հայկ Կարապետյանը։

«Հովհաննիսյանի հետ կապ է եղել։ Այս պահին ավելին ոչինչ ասել չենք կարող»,- ասել է Կարապետյանը:

Հովհաննիսյանը 21 տարեկան է, հանդես է եկել Ռուսաստանի պատանեկան և երիտասարդական հավաքականներում: Նախորդ ամառ հարձակվողը «Սպարտակից» վարձավճարով տեղափոխվել է «Օրենբուրգ»՝ մինչև 2022/23 մրցաշրջանի ավարտը։ «Օրենբուրգի» կազմում ֆուտբոլիստը բոլոր մրցաշարերում անցկացրել է 20 հանդիպում, դարձել է երեք գոլի և մեկ գոլային փոխանցման հեղինակ։