Նիստերը դռնփակ անցկացնելով՝ սահմանափակվում են Գրիգորի Խաչատուրովի իրավունքները. փաստաբան
Իրավունք
Գեներալ-մայոր Գրիգորի Խաչատուրովի գործով նախնական դատական լսումների ավարտին փաստաբան Միհրան Պողոսյանը լրագրողների հետ զրույցում շեշտեց՝ հանրային հետաքրքրություն ներկայացնող գործը դռնփակ ռեժիմով քննելու առիթ ու պատճառ չկար։
«Հիմնավորումներ ներկայացրինք, որ դատարանն իրավունք չուներ նախնական լսումներն իրականացնելու դռնփակ, սակայն դատարանը մերժեց՝ միմիայն հիմք ընդունելով, որ գլխավոր դատարանն այս գործին գաղտնիության շղարշ է հաղորդել: Բայց շատ կարևոր հանգամանք էր, որ մեղադրողը ևս ընդունեց, որ Գրիգորի Խաչատուրովի վերաբերյալ դրվագներում գաղտնի փաստական տվյալներ չկան, գաղտնի ապացույցներ չկան: Ուղղակի տեխնիկական բնույթից ելնելով, քանի որ գործին մի քանի գործեր են միացված, որոնք Խաչատուրովին ընդհանրապես չեն վերաբերում, բայց գաղտնի են, այդ իսկ պատճառով ընդհանուր գործը պահվում է գաղտնի: Մենք համարում ենք, որ Խաչատուրովի իրավունքների խախտում կա այս առումով»,- ասաց նա: Ըստ փաստաբանի, իրենք ամեն ինչ կանեն, որ հաջորդ դատական նիստերն ընթանան բաց:
«Նիստերը փակ անցկացնելու նպատակն այն է, որ հանրությունը չիմանա, թե ինչ աբսուրդ մեղադրանքներով է գեներալը քննվում»,- վստահեցրեց փաստաբանը:
Ըստ նրա, Գրիգորի Խաչատուրովի տրամադրությունն «ինչպես միշտ բարձր է, մարտական»:
Ամենադիտված 
Մնաս բարյավ. Րաֆֆի Հովհաննիսյան
