Սիրիայի քրդերն առաջին անգամ ներգրավվել են հակամարտությանը՝ ի պաշտպանություն Ասադի

Քրդական զինված խմբավորումները, որոնք մինչև վերջերս չեզոքություն էին պահպանում սիրիական հակամարտության հարցում, Հալեպ քաղաքում մարտի մեջ են մտել ընդդիմության դեմ պայքարում. գրում է «Коммерсантъ»-ը:

Եթե Բաշար ալ Ասադը կարողանա ամրապնդել այդ միտումը, ապա սիրիական պատերազմում ուժերի հավասարակշռությունը կարող է փոխվել կառավարական զորքերի կողմը:

Քրդերը կազմում են Սիրիայի բնակչության ավելի քան 10%-ը: Եթե նրանք հանդես գան կառավարության պաշտպանությամբ, ոչ միայն Հալեպում, այլև մյուս ճակատներում, դա լուրջ խնդիրներ կստեղծի ընդդիմության համար:

Բախումները քրդերի և Սիրիայի ազատ բանակի ջոկատների միջև ծայր էին առել այն բանից հետո, երբ ընդդիմադիրները փորձել էին իրենց իշխանությունը հաստատել քաղաքի հյուսիսային հատվածի Աշրաֆիա շրջանի վրա: Այն ռազմավարական առումով շատ կարևոր դիրք ունի, քանի որ գտնվում է բարձունքի վրա, որտեղից շատ լավ երևում և թիրախի տակ են առնվում բոլոր հարևան թաղամասերը:

Մինչ այժմ քրդաբնակ Աշրաֆիան ձեռնպահ է մնացել պատերազմից. ո՛չ կառավարական ուժերը, ո՛չ էլ հեղափոխականները չեն փորձել կոնֆլիկտի մեջ մտնել նրանց հետ: Սակայն Սիրիայի ազատ բանակայինները կարծես թե Աշրաֆիային տիրելը կարևոր համարեցին քրդական չեզոքությունից, ինչի արդյուքնում զոհվել է նվազագույնը 30 մարդ, ևս 200 (հինականում քրդեր) գերի են վերցվել: