ՀԱԿ-ն այն քաղաքական ուժը չէ, որ դառնա կցորդ. Լյուդմիլա Սարգսյան

«Հանգիստ փոթորիկից առաջ։ Թվում է՝ ակտիվ փուլ չենք մտել, բայց իրականում այդպես չէ։ Մոտ տասնհինգ օրվա ընթացքում քաղաքական ակտիվությունը կնկատենք։ Միայն Լևոն Տեր-Պետրոսյանի առաջադրումը կարող է լինել այդ փոթորիկը (համենայն դեպս, այսպիսի ցանկություն ունեն ՀԱԿ-ում)»։ Այս մասին լրագրողների հետ հանդիպմանն ասաց ԱԺ պատգամավոր Լյուդմիլա Սարգսյանը։

Ըստ բանախոսի՝ հաջորդաբար կեղծվող ընտրությունների պատճառով ժողովուրդն այլևս ակնկալիքներ չունի գալիք ընտրություններից, կա որոշակի հիասթափություն։ Այս իրավիճակը չի կարող երկար շարունակվել, նախագահական ընտրություններից միշտ ակնկալել է, որ բարեփոխումներ կլինեն, ու ժողովուրդն իր խոսքը կասի։

«Մենք թույլ իշխանություն ունենք, որը չունի ժողովրդի վստահությունը։ Սպասելիք առաջադրումները ցույց կտան, որ Սերժ Սարգսյանը այլընտրանք ունի և կպայքարի երկրորդ և երրորդ տեղի համար»,-ասաց Լյուդմիլա Սարգսյանը։

Անդրադառնալով Կոնգրեսի հետ քաղաքական այլ ուժերի հետ համագործակցությանը՝ Լյուդմիլա Սարգսյանը նշեց, որ եթե կան քաղաքական ուժեր, որ պատրաստ են Կոնգրեսի հետ զուգահեռ հնարավորություն տալ ժողովրդին ազատ ընտրություններ իրականացնել, ուրեմն չկան հավերժ թշնամիներ և բարեկամներ։ Պատգամավորը հավելեց նաև, որ ՀԱԿ-ն այն քաղաքական ուժը չէ, որ դառնա կցորդ և հայտնվի ինչ-որ կուսակցության թևի տակ։ «Կոնգրեսը դեռ ցույց կտա իր ուժը, և մենք շարունակում ենք պայքարել. լինում են պահեր, երբ քաղաքական ուժը անկումներ է ունենում, այսօր ՀԱԿ-ը վերելք է ապրում. դրա արդյունքում նախագահական հիմնական գործոնը ՀԱԿ-ն է լինելու։

Պատգամավորը խոստովանում է նաև, որ ՀԱԿ-ը որոշ ժամանակ անկում է ապրել, բայց հիմա ամեն ինչ կարգավորված է։ Կոնգրեսը կշարունակի իր ակտիվ պայքարը նախագահական ընտրություններին։

ՀԱԿ-ԲՀԿ հնարավոր համագործակցության մասին խոսելիս բանախոսը նշեց, որ առայժմ այդ հայտարարությունները Լևոն Զուրաբյանի կարծիքն են։ Կոնգրեսն այդպիսի հայտարարություն չի արել։ «Եթե ռեժիմի դեմ պայքարի միակ ուղին դա է, հնարավոր է, համագործակցենք այլ քաղաքական ուժերի հետ»։

Լյուդմիլա Սարգսյանն անդրադարձավ նաև «Ժառանգության» և «Ազատ Դեմոկրատներ»-ի լուծարմանը, նշելով, որ «տրոհումը բնական էր, քանի որ միավորումն արհեստածին էր»,-ասաց պատգամավորը։