Անահիտ Բախշյանը հաղորդում է հանցագործության մասին (տեսանյութ)

Դեռ օրեր առաջ Լուրեր.com-ը գրել էր, որ մեր աղբյուրների փոխանցմամբ՝ Երևանի թիվ 27 դպրոցում կրճատված 4 ուսուցիչներից Հայկ Սիմոնյանը դպրոցում աշխատել է միայն մի քանի ամիս, իսկ կրճատման հրամանը վերջինիս տրվել է մի քանի ամիս անց։

Լուրեր.com–ը հարց էր բարձրացրել, թե այդ դեպքում մի քանի ամիս շարունակ ինչպես է ստացվել, որ փաստացի չաշխատող ուսուցչի ազատումն աշխատանքից իրավաբանորեն ձևակերպվում է մոտ մեկ տարի անց։ Ոչ մեկի համար թերևս գաղտնիք չէ, որ եթե աշխատանքային պայմանագիրը լուծված չէ, ապա անձը համարվում է աշխատող, հետևաբար և վարձատրվում է։ Այս դեպքում առաջ է գալիս տրամաբանական մեկ այլ հարց՝ ո՞վ է ստացել փաստացի չաշխատող ուսուցչի աշխատավարձը։

Լուրեր.com–ն այսօր զրուցեց ՀՀ կրթության և գիտության նախարարության Կրթության ազգային ինստիտուտի փոխտնօրեն Անահիտ Բախշյանի հետ՝ ճշտելու գործի մանրամասները։

Բախշյանն ասաց, որ Հայկ Սիմոնյանի մասին դպրոցում աշակերտ, ուսուցիչ ասում են, որ նա, ըստ պայմանագրի, դեկտեմբերի 1-ից աշխատել է որպես մաթեմատիկայի ուսուցիչ։

Ընդ որում, Հայկ Սիմոնյանին տնօրենն աշխատանքի է ընդունել երեք ամիս ժամկետով, հետո այդ երեքը դարձրել են վեց ամիս՝ դեկտեմբերի մեկից մինչև հունիս։

«Երեխաները պնդում են, որ այս մարդն աշխատել է մինչև հունվարի կեսերը։ Հետո այլևս դպրոցում չեն տեսել, բայց ինքն օգոստոս ամսվա ցուցակում ստացել է մոտավորապես 140.000 դրամ աշխատավարձ։ Հիմա այս խնդիրը պետք է պարզի պատկան մարմինը։ Ես ահազանգում եմ, ես բարձրաձայնում եմ, ես հաղորդում եմ տալիս, մնացածը թող անեն պատկան մարմինները»,–ասաց Բախշյանը։

Նա նշեց, որ այս ցուցակում կան մարդիկ, ում անգամ իրենք չեն էլ ճանաչում։ 

«Սուրեն Մարգարյանը տնօրենի ամուսինն է, նա մի ժամանակ ռուսերենի ուսուցիչն էր։ Մենք միասին էլ չենք աշխատել։ Ըստ իմ տվյալների՝ նա հետագայում ներառական կրթության լեզվամասնագիտական թիմում էր աշխատում։ Ես դեռ պատգամավոր եղած ժամանակ դիմեցի և նշեցի, որ նա համապատասխան կրթություն չունի։ Լեզվի տեսչությունից փոխանցեցին, որ նրան այդ պաշտոնից ազատել են։ Նույնը աղջիկը՝ Մարգարյան Աննան. նա էլ էր այդ թիմում աշխատում, բոլորովին կապ չունեցող մասնագիտություն ուներ։ Տեսչությունը պատասխանեց, որ նրան էլ են ազատել աշխատանքից։ Հիմա թե Մարգարյան Սուրենը այստեղ որպես ինչ է աշխատում, որ աշխատավարձ է ստանում, ես չգիտեմ»,– ասաց նա և հավելեց, որ այս ամենի իրավաբանական տերմինը հաղորդում է հանցագործության մասին։

«Պատկան մարմինները թող պարզեն՝ ինչ է կատարվել։ Այստեղ իր հարսն էլ է աշխատավարձ ստացել՝ Քոչարյան Հասմիկ։ 

Լրագրողի այն հարցին՝ պատկան մարմիններն այս գործով արդեն զբաղվում են, թե՝ ոչ, Բախշյանն ասաց, որ դեռ ոչ, և հույս հայտնեց, որ պատկան մարմիններն այս հաղորդումից հետո կզբաղվեն. «Այս փասթաթղթերը ես սիրով կներկայացնեմ պատկան մարմիններին, եթե ինձնից պահանջեն»։

Բախշյանը նշեց նաև, որ հանկարծ չփորձեն ասել, թե Բախշյանն անձնական խնդիրներ ունի տնօրենի հետ. «Ես  հերթական անգամ ասում եմ, որ անձնական խնդիր ունեմ այն պաշտոնյաների հետ, ովքեր իրենց աթոռը չարաշահում են»։ 

Գայանե Համբարձումյան