Անօրինական համարանիշերով մեքենայով նախկին պատգամավորը վթարի է ենթարկվել

Հոկտեմբերի 29-ին ավտովթար է տեղի ունեցել Երևանում: Ժամը 20:00-ի սահմաններում, Երևանի Նար Դոսի 1-ին շենքի բնակիչ, 49-ամյա Արա Սիմոնյանը, վարելով «Մերսեդես ML» մակնիշի 036 ՕՕ 11 համարանիշի ավտոմեքենան, Ռուբինյանց և Դրոյի փողոցների խաչմերուկում, Դրոյի 4 շենքի հարևանությամբ տեղադրված արագաչափի մոտ բախվել է ճամփեզրի բետոնե քարերին:

Ինչպես հայտնում է ֆոտոլրագրող Գագիկ Շամշյանը, բարեբախտաբար, զոհեր և վիրավորներ չեն եղել: Դեպքի վայր է ժամանել Ճանապարհային ոստիկանության 1-ին սպայական գումարտակի սպայական ջոկի տեսուչ Հրանտ Աբրահամյանը: Գ. Շամշյանը հայտնում է, որ դեպքի վայրում հավաքվածները պատմել են, որ իրականում վարորդը եղել է երիտասարդ տղա, սակայն Արա Սիմոնյանը վթարից հետո ժամանելով դեպքի վայր, հայտնել է, որ մեքենան վարել է ինքը:

Ֆոտոլրագրողը հայտնում է, որ Ա. Սիմոնյանը Ազգային միաբանություն կուսակցության անդամ է և Ազգային ժողովի նախկին պատգամավոր: Արդեն երկու ամիս է, ինչ Ազգային ժողովի աշխատակազմը նրանից պահանջել է, որպեսզի ավտոմեքենայի համարանիշները հանձնի Ազգային ժողովի ավտոտնտեսություն, սակայն նա ամեն անգամ շուն ու կատվի նման խոստացել է, որ ուրբաթ օրը կհանձնի:

Վթարված ավտոմեքենան ապահովագրված է «ՌՈՍԳՈՍՍՏՐԱԽ» ընկերության կողմից (կասկո արված):

Shamshyan.com