«Սենդի» փոթորկի զոհերի թիվը հասել է 70-ի

Ավելի քան 10 մարդ զոհվել է ԱՄՆ-ի արևելքում «Սենդի» փոթորկի հետևանքով։ Փոթորկի զոհերի ընդհանուր թիվը գերազանցել է 70-ը։ Ինչպես հաղորդում է Интерфакс-ը, զոհերից մեկը մահացել էր Կոնեկտիկուտ նահանգի Մենսֆիլդ քաղաքում՝ ընկնող ծառի հարվածից։ Նյու Յորքում առանձնատան բակում ծառի տակ հայտնաբերվել է ևս մեկ դի։

Հյուսիսային Կարոլինայի ափերին որոտացած փոթորկի պատճառով խորտակվել է Bounty առագաստանավը։ Անձնակազմի 14 անդամները փրկվել են, մեկը՝ զոհվել։ Բացի դրանից՝ մամուլը հաղորդում է Նյու Յորքում ևս 4 զոհի մասին։

Նշենք, որ ավելի վաղ փոթորիկը Հաիթիում խլել է 52 մարդու կյանք։ Իրենց հերթին կուբական ԶԼՄ-ները հայտնում են Ազատության կղզում ևս 11 զոհի մասին։ Բահամյան կղզիներում, Ճամայկայում, Դոմինիկյան Հանրապետությունում և Պուետրո Ռիկոյում զոհվել է մեկական մարդ։

Բացի այդ, Կարիբյան ծովի ջրերում կիրակի օրը կորել է նավակ 6 զբոսաշրջիկներով Ֆրանսիայից։

Անցած ժամերի ընթացքում «Սենդի» փոթորիկը զգալիորեն թուլացել է, սակայն մասնագետները չեն բացառում, որ այն կարող է նոր թափ առնել։ Ամբողջ արևելյան ափին խախտված է երկաթուղիների աշխատանքը, հետաձգվել է ավելի քան ինը հազար չվերթ։ Ըստ փորձագետների՝ փոթորկի հասցրած վնասը կարող է գերազանցել 20 մլրդ դոլարը և անրադառնալ մոտ 50-60 միլիոն ամերիկացու վրա։