Նաիրա Զոհրաբյան. Հոկտեմբերի 27-ի գազաններին տեսնելու ցանկություն երբևէ չեմ ունեցել

Ս.թ հոկտեմբերի 26-ին ԱԺ պատգամավորներ Նաիրա Զոհրաբյանը, Էլինար Վարդանյանը, Ալեքսանդր Արզումանյանն ու Վահե Էնֆիաջյանն այցելել են «Երևան» քրեակատարողական հիմնարկ, որտեղ իրենց պատիժն են կրում նաև հոկտեմբերի 27-ի ոճրագործներ Նաիրի և Կարեն Հունանյանները։

«Բարգավաճ Հայաստան» խորհրդարանական խմբակցության քարտուղար Նաիրա Զոհրաբյանը Լուրեր.com-ի հետ զրույցում ասաց, որ նոյեմբերի 20-ին նախատեսված են Մարդու իրավունքների և Եվրոպական ինտեգրման հանձնաժողովների համատեղ լսումներ։ «Այդ լսումներին ընդառաջ՝ արդեն մոտավորապես երկու շաբաթից ավել է՝ մենք տարբեր քրեակատարողական հիմնարկներ ենք այցելում, իսկ քրեակատարողական հիմնարկների ընտրությունը պայմանավորված է նրանով, որ թե՛ եվրոպական միջազգային կառույցներում, թե՛ Եվրոպայի խորհրդի նախարարների կոմիտեի տարբեր զեյկույցներում, թե՛ Հայասատանում մարդու իրավունքների պաշտպանի, թե՛ նաև խոշտանգումների և այլ անմարդկային վերաբերմունքի կանխարգելման եվրոպական հանձնաժողովի զեկույցներում այդ քրեակատարողական հիմնարկները նշված են որպես որոշակի խնդրահարույց հիմնարկներ։ Հանդիպել ենք թե՛ ցմահ ազատազրկվածների հետ, թե՛ Նուբարաշենում նախնական կալանքի վայրեր ենք այցելել, որտեղ կային խնդիրներ հատկապես գերբնակեցման պատճառով։ Եղել ենք նաև «Երևան» քրեակատարողական հիմնարկում, որը ևս եվրոպական միջազգային զեկույցներում նշված էր որպես որոշակի առումով խնդրահարույց»,- ասաց Զոհրաբյանը։

Վերջինիս փոխանցմամբ՝ իրենք հինգշաբթի օրը կլինեն Նուբարաշենում, որտեղ վերջին օրերին կան խնդիրներ. «Հացադուլ են հայտարարել նշված ՔԿՀ-ում, և ինչ-որ մեկը մատն է կտրել։ Կլինենք նաև «Վանաձոր» քրեակատարողական հիմնարկում, որտեղ ևս խնդիրներ կան. որոշ կալանավորներ հայտարարել են, որ հացադուլի են պատրաստվում, և դրա հետ պայմանավորված՝ մենք կփորձենք ամփոփել բոլոր այն խնդիրները, որոնք կան այդ քրեակատարողական հիմնարկներում, այն խնդիրները, որոնք ենթադրում են օրենսդրական փոփոխություններ, բնականաբար, կփորձենք օրեսդրորեն լուծել։

Օրինակ՝ կալանավորներին հասնում է տեսակցություն՝ կարճաժամկետ և երկարաժամկետ։ Նուբարաշենում կալանավորները բարձրացրեցին հարց, որ այն կալանավորները, որոնց հարազատները Հայաստանում չեն, հնարավորություն տրվի իրենց ինտերնետ սենյակների միջոցով  Skayp-ով շփվել իրենց հարազատների հետ։ Կարծում եմ՝ տրամաբանական առաջարկ է, և մենք կփորձենք այս խնդիրը բարձրացնել։ Կան նաև այլ բազմաթիվ խնդիրներ»,-նշեց ԲՀԿ խմբակցության քարտուղարը։

Անդրադառնալով հոկտեմբերի 27-ի ոճրագործների հետ հանդիպմանը՝ Նաիրա Զոհրաբյանն ասաց, որ ինքը և Էլինար Վարդանյանը չեն մտել այն բանտախուց, որտեղ եղել է Նաիրի Հունանյանը։

«Ես ոչինչ չեմ կարող ասել, որովհետև ես բազմիցս այցելել եմ «երևան» քրեակատարողական հիմնարկ տարբեր առիթներով, և երբևէ ինձ մոտ ցանկություն չի առաջացել (հոկտեմբերի) 27-ի գազաններին տեսնել, և այդ օրը ևս ես կտրականապես հրաժարվեցի մտնել այդ խուց։ Իհարկե, ես այդտեղ դատապարտելի բան չեմ տեսնում, մարդիկ մեկ րոպե մտել են խուց և դուրս են եկել։ Այդ ժամանակ ես և Էլինար Վարդանյանը բուժկետն էինք նայում»,-նշեց Զոհրաբյանը։