Օրհան Փամուկն արժանացել է «Պատվո լեգեոն» շքանշանի սպայի աստիճանի

Ազգությամբ թուրք գրող, Նոբելյան մրցանակի դափնեկիր Օրհան Փամուկը երկուշաբթի երեկոյան արժանացել է «Պատվո լեգեոն» շքանշանի սպայի աստիճանի. հաղորդում է Agence France-Press-ը: Շքանշանը գրողը ստացել է Ֆրանսիայի Մշակույթի նախարար Օրելի Ֆիլիպետտիի ձեռքից:

Մրցանակը շնորհելով՝ Ֆիլիպետտին նշել է, որ Փամուկը տարիներ ի վեր հանդիսանում է նորարար և ավանգարդ գրող, որի արձակն առանձնանում է ոճի ազատությամբ: Այդ ազատությունը, նախարարի խոսքերով, համահունչ է մարդու ազատությունների հետ, որի պաշտպանությամբ հանդես է գալիս Օրհան Փամուկը՝ մերժելով անհանդուրժողականության, ճնշումների և վախի ցանկացած դրսևորում:

Օրհան Փամուկը, որի գրքերն աշխարհում վաճառվել են 11 մլն օրինակով, 2007թ. լքել է Թուրքիան՝ տեղափոխվելով ԱՄՆ: Նա ստիպված էր հեռանալ հայրենիքից ազգայնականների կողմից իրականացրած հետապնդումների արդյունքում, որոնք սկսվել էին 2005-ին այն բանից հետո, երբ շվեցարական թերթերից մեկում տված հարցազրույցի ժամանակ հայտարարել էր, որ թուրքերը պետք է ճանաչեն իրենց կողմից իրականացրած մեկ մլն հայերի և 300 հազար քրդերի ցեղասպանության փաստը: Դրանից հետո նրան մեղադրեցին համաքաղաքացիների զգացմունքները վիրավորելու մեջ, քանի որ Թուրքիան մերժում է Հայոց ցեղասպանության հարցում ցանկացած մեղադրանք:

«Ձյունը», «Խաղաղության տները», «Սև Գիրք», «Իմ անունը կարմիր է» գրքերի հեղինակին հոկտեմբերի 26-ին շնորհվել էր նաև Դանիայի մշակույթի ոլորտում Sonning prize մրցանակը, որը շնորհվում է եվրոպական մշակույթի զարգացման մեջ ունեցած ներդրումների համար:

Գրողը ստանալու է 134 մլն. եվրո պարգևատրում: