Ֆրանսիայի դեսպանը ԵՊՀ-ում

Այսօր ԵՊՀ Պալեանների անվան դահլիճում համալսարանականների հյուրը դեսպան Անրի Ռենոն էր:

Հանդիպմանը ներկա էին ԵՊՀ ռեկտոր Արամ Սիմոնյանը, Ուսանողների, շրջանավարտների եւ հասարակայնության հետ կապերի գծով պրոռեկտոր Ռուբեն Մարկոսյանը, Միջազգային հարաբերությունների ֆակուլտետի դեկան Գեղամ Պետրոսյանը, Միջազգային համագործակցության վարչության պետ Ալեքսանդր Մարգարովը, պրոֆեսորադասախոսական կազմի ներկայացուցիչներ, ուսանողներ, ինչպես նաեւ ՀՀ-ում ֆրանսիական դեսպանատան ներկայացուցիչներ:

Հյուրին նախ ողջունեց Արամ Սիմոյանը. «Ուրախ եմ տեսնել Ձեզ այսօր Մայր բուհում: Բոլոր համալսարանականների անունից վստահաբար կարող եմ ասել, որ Դուք ցանկալի հյուր եք մեզ համար: Հայ-ֆրանսիական համագործակցությունը տարեցտարի ավելի է ամրապնդվում եւ նորանոր բնագավառներ ներառում»,- իր խոսքում նշեց ռեկտորը:

Մինչ դեսպանի ելույթը ներկաներին հայոց պատմության մեջ Ֆրանսիայի դերակատարության եւ մեծ ավանդի մասին հակիրճ պատմական ակնարկ ներկայացրեց Գեղամ Պետրոսյանը: Այնուհետեւ Անրի Ռենոն հայերենով ողջունեց համալսարանականներին եւ նշեց, որ իր համար միշտ հաճելի են նմանաբնույթ հանդիպումները:

Նախնական պայմանավորվածության համաձայն՝ Անրի Ռենոն ուսանողների հետ պետք է խոսեր հայ-ֆրանսիական հարաբերությունների եւ երկու պետությունների միջեւ առկա փոխադարձ համագործակցության մասին, սակայն դեսպանն ավելի նպատակահարմար գտավ զրուցել Եվրոպայում ընթացող ներկա գործընթացների ու մասնավորապես Եվրամիության ստեղծման պատմության, որդեգրած ռազմավարության եւ աշխարհում նրա վարած քաղաքականության մասին:

Դեսպանը նաեւ անդրադարձավ 2012 թ-ին Եվրամիությանը խաղաղության Նոբելյան մրցանակ շնորհելուն, դրա նախապայմաններին եւ հեռանկարներին: Դասախոսությունից հետո ուսանողները դեսպանին մի շարք հարցեր ուղղեցին, որոնք վերաբերում էին Ֆրանսիայի արտաքին քաղաքականությանը և արևելյան համագործակցությանը, հայ-ադրբեջանական հարաբերություններին, ինչպես նաեւ կրթական ոլորտում նախատեսվող ծրագրերին:

Միջոցառման նպատակ էր ուսանողներին եւ պրոֆեսորադասախոսական կազմին ներկայացնել հայ-ֆրանսիական հարաբերությունների ընթացքն ու զարգացման հեռանկարների արդի փուլը: Հանդիպումը նաեւ կնպաստի Հայաստանի եւ Ֆրանսիայի միջեւ միջպետական հետագա կապերի, ինչպես նաեւ ԵՊՀ միջազգային հարաբերությունների: ysu.am