Պետական բյուջեի ծախսերն աճել են 23.4 մլրդ դրամով

2012 թվականի հունվար-սեպտեմբեր ամիսներին ՀՀ պետական բյուջեի ծախսերը նախորդ տարվա նույն ժամանակահատվածի համեմատ աճել են 3.7%-ով կամ 23.4 մլրդ դրամով: Ընդ որում, աճ է արձանագրվել ընթացիկ ծախսերի գծով, իսկ ոչ ֆինանսական ակտիվների հետ գործառնությունների գծով գրանցվել է անկում: Այս մասին ասված է ՀՀ ֆինանսների նախարարության կայքում զետեղված հաղորդագրության մեջ։

Ընթացիկ ծախսերը հաշվետու ժամանակահատվածում կազմել են 611.3 մլրդ դրամ` 94.7%-ով ապահովելով իննամսյա ծրագրի կատարումը: Նախորդ տարվա նույն ժամանակահատվածի համեմատ ընթացիկ ծախսերն աճել են 7.2%-ով կամ 41.2 մլրդ դրամով:

Ընթացիկ ծախսերից 54.7 մլրդ դրամ տրամադրվել է պետական հիմնարկների աշխատողների աշխատանքի վարձատրությանը, որը կազմել է իննամսյա ծրագրի 95.8%-ը և 2%-ով գերազանցել նախորդ տարվա հունվար-սեպտեմբեր ամիսների ցուցանիշը: 3.8 մլրդ դրամ տրամադրվել է պարտադիր սոցիալական ապահովության վճարներին` 92.6%-ով ապահովելով իննամսյա ծրագրի կատարումը և պահպանվելով նախորդ տարվա մակարդակին:

Ծառայությունների և ապրանքների ձեռքբերման նպատակով պետական բյուջեից օգտագործվել է 139.1 մլրդ դրամ, որը կազմել է իննամսյա ծրագրի 94.1%-ը և 19.6% ով գերազանցել նախորդ տարվա համապատասխան ցուցանիշը` հիմնականում պայմանավորված նյութերի ձեռքբերման ծախսերի աճով:

Հաշվետու ժամանակահատվածում 28.8 մլրդ դրամ տրամադրվել է պետական պարտքի սպասարկմանը` կազմելով իննամսյա ծրագրի 92.4%-ը: Մասնավորապես` նշված գումարից 18.5 մլրդ դրամը տրամադրվել է ներքին, 10.3 մլրդ դրամը` արտաքին պարտքի սպասարկմանը:

Պետական պարտքի սպասարկման ծախսերը 14.1%-ով գերազանցել են նախորդ տարվա նույն ցուցանիշը` պայմանավորված և՛ ներքին, և՛ արտաքին պետական պարտքի սպասարկման ծախսերի աճով:

Անցած ժամանակահատվածում ՀՀ պետական բյուջեից տրամադրվել են 15.4 մլրդ դրամի սուբսիդիաներ` կազմելով իննամսյա ծրագրի 95.5%-ը և 15.2%-ով գերազանցելով նախորդ տարվա ցուցանիշը:

Շուրջ 73.7 մլրդ դրամ են կազմել պետական բյուջեից տրամադրված դրամաշնորհները, որից 72.5 մլրդ դրամը տրամադրվել է պետական հատվածի այլ մակարդակներին, 1.2 մլրդ դրամը` միջազգային կազմակերպություններին: Մասնավորապես` համայնքների բյուջեներին տրամադրվել են 24.3 մլրդ դրամի դոտացիաներ, որոնք նախորդ տարվա նույն ժամանակահատվածի համեմատ գրեթե չեն փոփոխվել:

Դրամաշնորհների իննամսյա ծրագիրն ընդհանուր առմամբ կատարվել է 96.8% ով, իսկ նախորդ տարվա հունվար-սեպտեմբեր ամիսների համեմատ նշված ծախսերն աճել են 5.6% ով:

Ընթացիկ ծախսերի 34.8%-ը` 212.8 մլրդ դրամ, ուղղվել է սոցիալական նպաստների և կենսաթոշակների վճարմանը` ապահովելով ներկայացված բոլոր պարտավորությունների կատարումը և արձանագրելով իննամսյա ծրագրի 94.5% կատարողական: Մասնավորապես` նշված գումարից 147.3 մլրդ դրամ են կազմել կենսաթոշակները, 58.1 մլրդ դրամ` նպաստները: Շուրջ 7.4 մլրդ դրամ տրամադրվել է սոցիալական ապահովության միջոցառումների իրականացման նպատակով աշխատողներին առաջարկվող սոցիալական փաթեթի ծառայությունների շրջանակներում, որից 6.1 մլրդ դրամն օգտագործվել է բժշկական ապահովագրության նպատակով: Նախորդ տարվա նույն ժամանակահատվածի համեմատ նպաստների և կենսաթոշակների ծախսերն ավելացել են 11.7%-ով կամ 22.3 մլրդ դրամով:

Հաշվետու ժամանակահատվածում պետական բյուջեի միջոցներից 83 մլրդ դրամ տրամադրվել է այլ ծախսերին` կազմելով իննամսյա ծրագրի 94.5% ը և 14.8%-ով զիջելով նախորդ տարվա նույն ցուցանիշը:

Պետական բյուջեի ոչ ֆինանսական ակտիվների հետ գործառնությունները հունվար- սեպտեմբեր ամիսներին կազմել են 48.9 մլրդ դրամ կամ իննամսյա ծրագրի 68% ը: Մասնավորապես` 51.5 մլրդ դրամ են կազմել ոչ ֆինանսական ակտիվների գծով ծախսերը, որոնց իննամսյա ծրագիրը կատարվել է 70.2%-ով: Շուրջ 2.6 մլրդ դրամ է մուտքագրվել ոչ ֆինանսական ակտիվների օտարումից` 92.3% ով գերազանցելով իննամսյա ծրագիրը:

Նախորդ տարվա նույն ժամանակահատվածի համեմատ ոչ ֆինանսական ակտիվների հետ գործառնությունների ցուցանիշը նվազել է 26.8%-ով` հիմնականում պայմանավորված շենքերի և շինությունների վրա կատարված ծախսերի նվազմամբ: