Պետական բյուջեն կատարվել է առանց պակասուրդի. պաշտոնական

2012 թվականի հունվար-սեպտեմբեր ամիսներին ՀՀ պետական բյուջեն կատարվել է 6.2 մլրդ դրամ հավելուրդով՝ ծրագրով նախատեսված 57.4 մլրդ դրամ պակասուրդի դիմաց: Մասնավորապես` պակասուրդի ներքին ֆինանսավորումը կազմել է -20.2 մլրդ դրամ, արտաքին ֆինանսավորումը՝ 14.0 մլրդ դրամ: Այս մասին ասված է ՀՀ ֆինանսների նախարարության պաշտոնական կայքում զետեղված հաղորդագրության մեջ։

Հավելուրդը հիմնականում պայմանավորված է ծախսերի համեմատաբար ցածր կատարողականով: Վերջինիս, ինչպես նաև արտաքին աղբյուրներից նախատեսվածից շուրջ 26 մլրդ դրամով ավելի վարկային միջոցների ստացման արդյունքում ֆինանսավորման ներքին աղբյուրներում բյուջեի ազատ միջոցներից իննամսյա ծրագրով նախատեսված 63.3 մլրդ դրամ օգտագործման դիմաց նշված միջոցներն ավելացել են 27.5 մլրդ դրամով:

Ներքին աղբյուրներում 11.4 մլրդ դրամ են կազմել փոխառու զուտ միջոցները, 31.6 մլրդ դրամ` ֆինանսական զուտ ակտիվները: Մասնավորապես` 12.4 մլրդ դրամ են կազմել գանձապետական պարտատոմսերից զուտ մուտքերը: Մուրհակների մարման նպատակով օգտագործվել է 203.5 մլն դրամ:

Հաշվետու ժամանակահատվածում ՀՀ ռեզիդենտներին պետական բյուջեից տրամադրվել են շուրջ 10.0 մլրդ դրամի վարկեր կամ իննամսյա ծրագրով նախատեսված ծավալի 88.4%-ը: Շուրջ 5.8 մլրդ դրամ ստացվել է տրամադրված ներքին վարկերի վերադարձից, որը 23.5%-ով գերազանցել է իննամսյա ծրագրով կանխատեսված ցուցանիշը` պայմանավորված ՌԴ վարկի հաշվին տրամադրված վարկերի վերադարձով:

Անցած ժամանակահատվածում պետական բյուջեի պակասուրդի արտաքին ֆինանսավորումը կազմել է 14.0 մլրդ դրամ, այդ թվում` 43.6 մլրդ դրամը` փոխառու զուտ միջոցների, 29.6 մլրդ դրամը` ֆինանսական զուտ ակտիվների գծով: Արտաքին աղբյուրներից տրամադրվել են 60.2 մլրդ դրամի վարկային միջոցներ:

Մասնավորապես` Եվրամիության կողմից Մակրոֆինանսական աջակցության ծրագրի շրջանակներում հաշվետու ժամանակահատվածում տրամադրվել է 20.2 մլրդ դրամ, Համաշխարհային բանկի հետ Զարգացման քաղաքականության երրորդ ծրագրի շուրջ գործող համաձայնագրի շրջանակներում` 30.3 մլրդ դրամ, Արժույթի միջազգային հիմնադրամի կողմից` 9.8 մլրդ դրամ:

Արտաքին պարտավորությունների մարմանն ուղղվել է 16.6 մլրդ դրամ, որից 5.6 մլրդ դրամ հատկացվել է Համաշխարհային բանկի աջակցությամբ իրականացվող ծրագրերի գծով պարտքի մարմանը, 260.2 մլն դրամ` ԳԶՄՀ, 137.4 մլն դրամ` ՎԶԵԲ, 315.8 մլն դրամ` ՕՊԵԿ միջազգային զարգացման հիմնադրամի նկատմամբ ունեցած պարտքի մարմանը, 654.7 մլն դրամ` ԱՄՆ ապրանքային վարկերի մարմանը, 1.2 մլրդ դրամ է տրամադրվել Էլեկտրաէներգիայի հաղորդման և բաշխման համակարգի ծրագրի գծով Ճապոնիայի նկատմամբ պարտքի մարմանը, 55.6 մլն դրամ` ԱԷԿ-ի վառելիքի չոր պահպանման համակարգի ծրագրի գծով Ֆրանսիայի նկատմամբ պարտքի մարմանը, 346.7 մլն դրամ` Գերմանիայի Դաշնային Հանրապետության նկատմամբ պարտավորությունների մարմանը:

Հաշվետու ժամանակահատվածում 28.7 մլրդ դրամ միջպետական վարկ է տրամադրվել ԼՂՀ-ին` ապահովելով 100% կատարողական: Վրաստանի կողմից Հայաստանի նկատմամբ ունեցած վարկային պարտավորությունների գծով կատարվել է 229 մլն դրամի վճարում` կազմելով իննամսյա ծրագրի 100%-ը: Բաժնետոմսերի և կապիտալում այլ մասնակցության ձեռքբերմանն ուղղվել է 906.3 մլն դրամ` կազմելով իննամսյա ծրագրի 99.1%-ը և 13.4% ով գերազանցելով նախորդ տարվա համապատասխան ցուցանիշը:

Հաշվետու ժամանակահատվածում 165.1 մլն դրամով ավելացել է արտաքին աղբյուրներից ստացված արտաբյուջետային դրամաշնորհային միջոցների մնացորդը: