«Համաշխարհային հմտություններ» միջազգային մրցույթի հայ մասնակիցները

2013 թվականի հուլիսի 2-7-ը Գերմանիայի Դաշնային Հանրապետության Լայպցիգ քաղաքում Հայաստանի ՄԿՈւ հաստատությունների ուսանողներն առաջին անգամ հնարավորություն կունենան ներկայանալ և իրենց հմտություններով մրցակցել 61 երկրների ուսանողների հետ՝ «Համաշխարհային հմտություններ» 42-րդ միջազգային մրցույթում: Ոսկերչություն, նորաձևություն, խոհարարություն մասնագիտությունների գծով «Հայաստանի հմտություններ» ազգային մրցույթում հաղթող ճանաչված ուսանողներն այսօր պարգևատրվել են շնորհակալագրերով և համապատասխան խրախուսական մրցանակներով:

Մրցույթի հաղթողներին ողջունել և պարգևներ է հանձնել ՀՀ կրթության և գիտության նախարար Արմեն Աշոտյանը. «Գաղտնիք չէ, որ Հայաստանն այսօր ունի որակյալ աշխատուժի պակաս: Երկար տարիներ մեր հասարակության երիտասարդ հատվածը համակված էր մի մոլուցքով՝ բոլոր հնարավոր միջոցներով ստանալ բացառապես բարձրագույն կրթություն: Արդյունքում՝ նրանց զգալի մասն այսօր գործազուրկ է, որովհետև չի տիրապետում համապատասխան հմտությունների և չի կարողանում իր տեղը գտնել աշխատաշուկայում: Ուրախալի է, որ վերջին տարիների ընթացքում պետությունը մեծ ջանքեր է ներդրել, որպեսզի միջին մասնագիտական կրթության ոլորտը դուրս գա հանրակրթության և բարձրագույն կրթության համակարգերի ստվերից, վերաարժևորվի և գտնի իր արժանի տեղը: Ուստի, պատահական չէ, որ վերջին տարիներին մասնագիտական կրթության այս հատվածը դարձել է առավել գրավիչ. միայն այս տարի 11 հազար երիտասարդի՝ կրթությունը շարունակելու ընտրությունը կանգ է առել միջին և նախնական մասնագիտական կրթօջախների վրա, որոնք սկսել են իրականում մատուցել աշխատաշուկայում պահանջված, գործատուների կողմից ակնկալվող կրթության մակարդակ»,- նշել է Արմեն Աշոտյանը՝ հավելելով, որ հետագա բարեփոխումների իրականացման համար նախարարությունն ակնկալում է միջազգային և տեղական գործընկերների աջակցությունը: «Վերջին տարիներին պետությունը 50 տոկոսով ավելացրել է անվճար տեղերի քանակը նախնական և միջին մասնագիտական կրթության ոլորտում, տասնյակ քոլեջներ վերազինվել են, վերանորոգվել, ամբողջությամբ վերանայվել է կրթական բովանդակությունը՝ մշակվում են կրթական նոր չափորոշիչներ, շարունակվում է մասնավոր հատվածի հետ համագործակցությունը՝ կրթական ծառայություներն ավելի որակյալ և նպատակային դարձնելու համար: Նախարարության համար չկան սիրելի և խորթ զավակներ կրթության ոլորտում. պետական քաղաքականությունը շարունակելու է լինել կառուցողական՝ ձևավորված պահանջարկի բավարարման և կրթության մակարդակի բարձրացման վրա»,-նշել է նախարարը՝ հույս հայտնելով, որ «Համաշխարհային հմտություններ» միջազգային մրցույթում Հայաստանի ներկայացուցիչները պատշաճ կներկայանան:

Ազգային փուլի հաղթողներին պարգևներ են հանձնել նաև Հայաստանի երիտասարդական հիմնադրամի, ինչպես նաև ՀՀ Առևտրաարդյունաբերական պալատի, Հայաստանի գործատուների միության և այլ սոցիալական գործընկերների ներկայացուցիչներ:
Վերոնշյալ համաշխարհային կառույցին՝ որպես հարող անդամ, Հայաստանը միացել է 2012թվականին՝ Գերմանիայի միջազգային համագործակցության ընկերության (ԳՄՀԸ/GIZ GmbH-ի) աջակցությամբ, «Հայաստանի հմտություններ» նախագծի շրջանակներում: «Հայաստանի հմտություններ» նախագիծը իր շուրջը միավորում է ՀՀ կրթության և գիտության նախարարությանը, Կրթության ազգային ինստիտուտի մասնագիտական կրթության և ուսուցման զարգացման ազգային կենտրոնին և սոցիալական գործընկերներին՝ ՀՀ առևտրաարդյունաբերական պալատին, Հայաստանի գործարարների (գործատուների) ու արդյունաբերողների միությանը, Հայաստանի գործատուների միությանը: