Նախարարը ողջունեց հայ ոսկերիչների կոնֆերանսի մասնակիցներին

Հոկտեմբերի 30-ին ՀՀ սփյուռքի նախարար Հրանուշ Հակոբյանը մասնակցեց «Հայաստանի ոսկերչական արդյունաբերության զարգացման հեռանկարները» խորագիրը կրող կոնֆերանսին: Մասնակիցներին շնորհավորելով մասնագիտական տոնի առթիվ՝ նա մասնավորապես նշեց. «Առանձնակի ջերմությամբ եմ ողջունում ձեզ մայր Հայրենիքում: Դուք ձեր գործունեությամբ, արվեստով ու արհեստով ողջ աշխարհին ներկայացնում եք հային ու հայությանը: Կարողանում եք զուգորդել հինն ու նորը, հայկականություն ու ազգային ոգի հաղորդել ձեր ստեղծածին…»: Նախարար Հ.Հակոբյանը հորդորեց ներկաներին զուտ բարեգործական ծրագրերից անցնել կոնկրետ գործողությունների՝ Հայաստանում ներդրումներ կատարելով բիզնես ծրագրեր իրականացնել:

Կոնֆերանսը բացեց Հայ ոսկերիչների ասոցիացիայի նախագահ Գագիկ Գևորգյանը՝ հակիրճ ներկայացնելով AJA-ի գործունեությունը: Ելույթներով հանդես եկան ՀՀ էկոնոմիկայի փոխնախարար Տիգրան Հարությունյանը, Ոսկեգործության համաշխարհային կոնֆեդերացիայի նախագահ դոկտոր Գայետանո Կավալիերին, Վարդգես Քնաջյանը և Պիեր Աքքլյանը, «Bill Boyajian and Associates, Inc» ընկերության գլխավոր գործադիր տնօրեն Բիլ Բոյաջյանը:

Կոնֆերանսին մասնակցում էին շուրջ 70 երկրների հայ ոսկերիչներ, ՀՀ տարբեր գերատեսչությունների ղեկավարներ, Հայ ոսկերիչների ասոցիացիայի հիմնադիրներ ու ներկայացուցիչներ:

Նշենք նաև, որ հոկտեմբերի 29-ին կայացավ նաև Հայ ոսկերիչների ասոցիացիայի կազմակերպված Yerevan Show 2012 ոսկերչական ցուցահանդեսի բացումը: