Ովքե՞ր են ԱԺ «ամենաաղքատ» պատգամավորները

Այն որ ԱԺ պատգամավորները ապրում են միայն աշխատավարձի հույսին, գուցե մի փոքր ֆանտաստիկայի ժանրից է, այդուամենայնիվ, ինչպես պարզվում է, կան պատգամավորներ, ովքեր դեռ չունեն բիզնես: Slaq.am-ը խոսել է նրանիցից մի քանիսի հետ, և փորձել պարզել պատճառները: Անհաջող բիզնեսից մինչև ցածր աշխատավարձեր:

ԱԺ անկախ պատգամավոր Էդմոն Մարուքյանը չունի անգամ սեփական բնակարան և բնակվում է վարձով: Պատգամավորի տան վարձը համաչափ չի վճարում պետությունը:

-Պարոն Մարուքյան, Դուք բիզնես ունե՞ք:
-Ոչ չունեմ:
-Իսկ ապրում եք միայն աշխատավարձո՞վ:
-Այս պահին չունեմ այլ եկամուտ և միայն աշխատավարձի հույսին եմ:
-Եվ կարծում եք, որ դա հպարտանալու առի՞թ է:
-Որպես պատգամավոր կարծում եմ հպարատանալու առիթ ունեմ, որ բիզնես չունեմ: Այսինքն' պրոֆեսինալ պատգամավոր եմ, մյուս կողմից, շատ դժվար է 260 հազար դրամ աշխատավարձով ապրել: Վանաձոր քաղաքից Երևան տեղափոխվել ու վարձով ապրել, և այն դեպքում, երբ պետությունը վարձը համաչափ չի փոխհատուցում... կարծում եմ ուղղակի մարտահրավեր է այդպես ապրելը: Օրենքով պետք է տրվի վարձավճարը, բայց չի տրվում:
-Պլաններ կա՞ն բիզնես ունենալու:
-Պլաններ չունեմ, քանի որ չեմ պատկերացնում ինչպես կարող է դա լինել:

ՀՀԿ-ական պատգամավոր Մարգարիտ Եսայանը ներդրած «բիզնեսի» հետևանքի վարկերն է փակում:

-Տիկին Եսայան բիզնես ունե՞ք:
-Ոչ, իհարկե չունեմ, որտեղից:
-Միայն աշխատավարձո՞վ եք ապրում:
-Ես ամուսնացած կին եմ, ունեմ ամուսին, ով ունի մի փոքրիկ արտադրություն, և այս ամբողջ ընթացքում' և’ լրագրող աշխատած տարիներին և’ հիմա մեր ընտանիքի հիմնական եկամուտը գոյանում է մեր փոքրիկ բիզնեսից:
-Դա կարելի է հավանաբար համարել ընտանեկան բիզնե՞ս:
-Ոչ, դա ընտանեկան բիզնես չի կարելի անվանել, քանի որ այն մետաղա- մեխանիկական ինչ որ արտադրություն է, որտեղ միայն մի քանի աշխատող կա' 3-4 հոգի, որի հետ ես որևէ առնչություն չունեմ: Դա այնքան էլ չի կարելի բիզնես համարել:
-Հպարտանալու առի՞թ է բիզնես չունենալը:
- Հպարտանալու առիթ չէ, իհարկե, ես կուզեի, որ ՀՀ քաղաքացիներն ունենային իրենց փոքրիկ բիզնեսը: Ես կուզեի, որ մեր քաղաքացիներն այնքան ապահովված լինեին, որ ավելի բարեկեցիկ և ապահով ապրեին:
-Եթե ավելի շատ վճարվեիք, կհիմնեի՞ք սեփական բիզնես:
-Ոչ ես բիզնեսից ոչինչ չեմ հասկանում, հաստատ տանուլ կտամ: Մոտ 2 տարի առաջ իմ փոքրիկ աղջիկը փոքրիկ բիզնես ծրագիր ուներ: Մենք վարկ վերցրեցինք ու իհարկե տանուլ տվեցինք, քանի որ այդ բիզնեսը չկարողացանք աշխատեցնել: Տարածքը, որը վարձակակալ էինք, այնքան թանկ էր, որ վարկը տվեցինք տարածքի վարձ ու մինչև հիմա իմ աղջկա հետ այդ վարկի գումարներն եմ մարում: Բիզնեսը շնորհք է: Ամեն մարդ չի կարող բիզնեսով զբաղվել: Անգամ իմ մոտ գաղափար է հղացել մի փոքրիկ պատմվածք գրել այն մասին, թե «Ինչպես ես չդարձա բիզնեսմեն»: Այժմ շատ զբաղված եմ, հետո կգրեմ:
-Աշխատավարձը բավականացնու՞մ է թեկուզ սեփական կարիքները հոգալու համար:
-Ոչ, չի բավակացանում: Իրականում մեր աշխատավարձը շատ քիչ է: Անհարմար է նույնիսկ, որ դրա մասին ասեմ: Ես կարծում եմ, որ այս խորհրդարանում մեծամանություն են այն պատգամավորները, ովքեր բիզնես չունեն, օլիգարխ չեն, կուտակված գումարներ չունեն, նորմալ մարդկային կյանքով են ապրում: 240 հազար դրամ է կազմում մեր աշխատավարձը: Իհարկե, բավարար չէ, ու իհարկե քիչ է: Այլ քաղաքացիների աշխատավարձի համեմատ սա բավականին լուրջ գումար է, այդուհանդերձ պատգամավորը այլ խնդիրներ ունի լուծելու, որոնք գումարի հետ են կապված:

ԲՀԿ-ական պատգամավոր Նաիրա Զոհրաբյանը այդպես էլ չասաց, թե արդյո՞ք միայն աշխատավարձի հույսին է:

-Տիկին Զոհրաբյան բիզնես ունե՞ք:
-Կարծում եմ նրանք, ովքեր ճանաչում են ինձ, գիտեն, որ ես որևէ բիզնես չունեմ: Բացի բնակարանից չունեմ որևէ սեփականություն: Անկեղծ ասած, երբևէ ցանկություն էլ չեմ ունեցել բիզնես ունենալու:
-Հնարավո՞ր է, որ շատ գումար ունենալու դեպքում, բիզնես ստեղծեք:
-Ոչ հնարավոր չէ:
-Այդ դեպքում միայն աշխատավարձի հույսի՞ն եք:
-Դա մեր կուսակցության ներքին խնդիրն է և ես չէի ցանկանա դրա մասին խոսել: Ես բիզնես չունեմ:
-Կարծում եք հպարատանալու՞ առիթ է, որ այսօր Հայստանում ԱԺ պատգամավորը բիզնես չունի:
-Ես դրա մասին չեմ մտածել, քանի որ անկեղծ ասած' չի հետաքրքրում;
-Ավելի շատ գումար ունենալու դեպքում, որևէ բիզնես չե՞ք սկսի:
-Բիզնեսի ոլորտն ինձ չի հետատքրում:
-Եթե այնուամենայնիվ ունենաք, կարո՞ղ եք ղեկավարել այն:
-Իհարկե, ես չեմ կարող ղեկավարել: Ես այդ ունակությունը չունեմ և երբևէ ցանկություն չեմ ունեցել որևէ ոլորտում բիզնես ունենալու:

ՀԱԿ պատգամավոր Լյուդմիլա Սարգսյանը բիզնես չունենալով չի հպարտանում:

-Տիկին Սարգսյան բիզնես ունե՞ք:
-Ոչ, իհարկե: Ընդդիմության մեջ քչերը կան, ովքեր կարող են գոնե մի փոքրիկ բիզնես ունենալ: Երբեք բիզնես չեմ ունեցել:

-Միայն աշխատավարձո՞վ եք ապրում, թե՞ ունեք այլ եկամուտներ:

-Ոչ, ապրում եմ միայն աշխատավարձով և պետք է խոստովանեմ, որ շատ դժվար է աշխատավարձով ապրելը: ԱԺ պատգամավոր լինելը լրացուցիչ ծախսեր է իր մեջ պարունակում և պարտավորեցնող բաներ կան, բայց դժվբախտաբար մենք այդ հնարավորություն չունենք:

-Արդյո՞ք բիզնես չունենալը հպարտանալու առիթ է:

-Ոչ, ես դրանով չեմ հպարտանում: Եթե օրինական բիզնես ունես և օրինապաշտ հարկատու ես, վատ չէ: Եթե մարդը հնարավորություն և ջիղ ունի սկսելու մանր բիզնեսից և ինչ-որ հաջողությունների հասնել, ինչու՞ ոչ: Կոնկրետ ես բիզնեսի մարդ չեմ նաև հնարավորություն չեմ ունեցել:

-Եթե հնարավորություն ունենաք, բիզնես կհիմնե՞ք:

-Կարծում եմ, որ առաջիկա հինգ տարիներին ես նման հնարավորություն չեմ ունենա, քանի որ օրենքով ամրագրված է, որ պատգամավորն իրավունք չունի բիզնեսով զբաղվել:

Աղբյուրը՝ slaq.am