Չինուհին առաջարկել է վարձակալել իրեն՝ իր հետ հաճելի և կարևոր գործեր անելու համար

Չինաստանից մի աղջիկ մարդկանց առաջարկել է վարձակալել իրեն՝ իր հետ հաճելի և կարևոր գործեր անելու համար։ Այս մասին հայտնում է South China Morning Post-ը (SCMP):

Պեկինից 26-ամյա չինուհին, որը հայտնի է Փեգի անունով, չելենջ է կազմակերպել և առաջարկել է իրեն վարձակալել մեկ յուան գումարի դիմաց: Կինը ցանկանում է «երջանիկ գործ» անել հարյուր անծանոթների հետ, որպեսզի «իրեն ողջ զգա»։ Նա սկսել է իր ծառայությունները գովազդել չինական Xiaohongshu սոցիալական ցանցում դեռ մայիսին՝ գրելով, որ «պատրաստ է ընկերակցել այն գործերում, որոնք մարդիկ չեն համարձակվում միայնակ անել»։

Փեգին արդեն օգնել է երեք վարձակալների. նա այգում փուչիկներ է վաճառել ամաչկոտ ծրագրավորողի հետ, գնացել մագլցման համալսարանի միայնակ շրջանավարտի հետ և ընկերակցել մի տղամարդու, ով ցանկանում էր մասնակցել McDonald's-ի ռեստորանում երեխաների համար նախատեսված խաղային միջոցառմանը:

Փեգին լրագրողներին ասել է, որ մերժել է այն մարդկանց, ովքեր պարզապես ցանկանում էին ճաշել իր հետ։ Պատճառն այն է, որ, ըստ աղջկա, իր ծառայությունները պետք է իսկապես խորը նշանակություն ունենան իրեն խնդրանք ուղարկողների համար։ Օրինակ, մոտ ապագայում նա պատրաստվում է գնումներ կատարել մի աղջկա հետ, ով ամաչում է իր արտաքինից։

Փեգին նման փորձարկումների է դիմել, քանի որ ցանկանում էր մի քանի տարվա անհաջողությունից հետո գտնել կյանքի իմաստը։ Սինցզյան ույղուրական ինքնավար մարզում ծնված աղջիկը Պեկինի համալսարանն ավարտելուց հետո փորձել է աշխատանք գտնել, սակայն չի հաջողվել։ 2021 թվականին վերադառնալով Պեկին՝ Փեգին մի քանի աշխատատեղ է փոխել, բայց դրանցից ոչ մեկը նրան ուրախություն չեն պարգևել։