Նա ուներ մի արտոնություն, որը չունեն մյուսները. Պուտինը՝ Բերլուսկոնիի մասին (լուսանկարներ)

Ռուսաստանի նախագահ Վլադիմիր Պուտինը ցավակցություն է հայտնել Իտալիայի նախագահ Սերջիո Մատարելային՝ երկրի նախկին վարչապետ, «Առաջ Իտալիա» կուսակցության հիմնադիր Սիլվիո Բերլուսկոնիի մահվան կապակցությամբ։ Իր հեռագրում ՌԴ նախագահը Բերլուսկոնիին անվանել է «սիրելի մարդ և իսկական ընկեր», գրում է Kommersant-ը։

Պուտինը նշել է, որ Սիլվիո Բերլուսկոնին «անգնահատելի ներդրում» է ունեցել ռուս-իտալական գործընկերային հարաբերությունների զարգացման գործում։ «Ռուսաստանում Սիլվիո Բերլուսկոնիին կհիշեն՝ որպես մեր երկրների միջև բարեկամական հարաբերությունների ամրապնդման հետևողական և սկզբունքային կողմնակից։ Ինձ համար Սիլվիոն թանկ մարդ էր, իսկական ընկեր։ Ես միշտ անկեղծորեն հիացել եմ նրա իմաստությամբ, նույնիսկ ամենադժվար իրավիճակներում հավասարակշռված, հեռատես որոշումներ կայացնելու նրա կարողությամբ։ Նրա հեռանալը կյանքից անդառնալի կորուստ է և մեծ վիշտ»,- ասված է ուղերձում։

«Այժմ միջազգային ասպարեզում նման մարդիկ քիչ են։ Քաղաքական գործչի համար նա շատ անսովոր անձնավորություն էր, քանի որ շատ անկեղծ էր և բաց: Եվ նա ուներ մի արտոնություն, որը չունեն այս մասշտաբի քաղաքական գործիչները։ Արտոնությունն այն էր, որ նա ասում էր այն, ինչ մտածում էր։ Ցավալի է»,- ավել ուշ լրագրողների հետ զրույցում ասել է Պուտինը։