ՀՀ և ՌԴ նախարարությունների ներկայացուցիչները հանդիպել են ՀՌՀ-ի գիտխորհրդի անդամների հետ
Հասարակություն
Հայ-Ռուսական համալսարանում այսօր կայացել է ՀՀ ԿԳՄՍ նախարարի տեղակալ Արա Խզմալյանի, ՌԴ բարձրագույն կրթության և գիտության նախարարի տեղակալ Կոնստանտին Մոգիլևսկու և երկու գերատեսչությունների ներկայացուցիչների հանդիպումը Հայ-Ռուսական համալսարանի գիտական խորհրդի անդամների հետ։
ՀՌՀ մամուլի ծառայությունից հայտնում են, որ հանդիպման ընթացքում ՀՀ ԿԳՄՍ նախարարի տեղակալը և ՌԴ բարձրագույն կրթության և գիտության նախարարի տեղակալը ներկայացրել են գիտխորհրդի անդամներին ՀՌՀ-ի նորընտիր ռեկտոր Էդվարդ Սանդոյանին։
Բացի այդ՝ գիտխորհրդի ընթացքում քննարկվել են ՀՌՀ-ի ընթացիկ գործունեության հետ կապված հարցերը, ընդգծվել է ՀՀ ԿԳՄՍ նախարարության և ՌԴ բարձրագույն կրթության և գիտության նախարարության հետ սերտ համագործակցության կարևորությունը, նախանշվել են բուհի հետագա զարգացմանն ուղղված ծրագրերը։
Մինչև հանդիպումը Հայ-Ռուսական համալսարանի հյուրերը շրջայց են կատարել համալսարանի տարածքով (սպորտային համալիր, Արևելագիտության ինստիտուտ, լաբորատորիաներ, նոր մասնաշենք և այլն)։
Գիտխորհրդի ավարտին ՀՀ և ՌԴ գերատեսչությունների ներկայացուցիչները հաջողություն և արդյունավետ աշխատանք են մաղթել ՀՌՀ նորընտիր ռեկտոր Էդվարդ Սանդոյանին։
Ամենադիտված 
Հունվարից երևանցին վճարելու է ամենաթանկ սակագինը տրանսպորտային երթևեկության համար
