Բրազիլիայում բանկը պատահաբար ավելի քան 26 միլիոն դոլար է փոխանցել տաքսու վարորդին

Բրազիլիայի Պալմաս քաղաքից 58-ամյա Անտոնիո Պերեյրա դու Նասիմենտան հանկարծակի հարստացել է, երբ բանկը պատահաբար նրան է փոխանցել 131 870 227 ռեալ (ավելի քան 26 միլիոն դոլար), հայտնում է Daily Star-ը։

Տաքսու վարորդը զարմացել է, քանի որ վիճակախաղ չի խաղացել։ Անտոնիոն նաև ֆիքսված եկամուտ չունի:

«Այնքան շատ զրոներ կային, ես վախեցա: Ես կյանքում նման գումար չէի տեսել և չէի էլ ստացել: Դա կարող էր պատահել միայն այն դեպքում, եթե վիճակախաղով շահեի, բայց ես չեմ խաղում», - ասել է նա:

Պարզվել է, որ գումարը նրա հաշվին է հայտնվել երկու բանկերի միջեւ փոխանցման սխալի պատճառով։

«Ես գնացի տուն և կնոջս ասացի՝ «Մենք հարստացել ենք», բայց հետո կինս ասաց. «Մենք պետք է վերադարձնենք գումարը»։ Գնացի բանկը փնտրելու, թուղթ ստորագրեցի, և երեկոյան ժամը իննին իմ հաշվի գումարը փոխանցվեց ճիշտ հաշվեհամարին»,- հավելել է նա։