Նաիրա Զոհրաբյանը կհանդիպի քաղբանտարկյալ ՀԱԿ ակտիվիստին և փուչիկների գործով դատապարտված Սերոբ Բոզոյանին

Վաղը՝ նոյեմբերի 1-ին, ԱԺ մարդու իրավունքների պաշտպանության և եվրոպական ինտեգրացիայի մշտական հանձնաժողովների անդամները «Նուբարաշեն» քրեակատարողական հիմնարկում հանդիպելու են ՀԱԿ ակտիվիստ Տիգրան Առաքելյանին։ ԱԺ ԲՀԿ խմբակցության քարտուղար, եվրաինտեգրացիայի հարցերով մշտական հանձնաժողովի նախագահ Նաիրա Զոհրաբյանը Lurer.com-ի հետ զրույցում նշեց, որ այցի նպատակն է ուսումնասիրել կալանավորների և դատապարտյալների պայմանները, լսել նրանց բողոքները։

Ինչպես իր խոսքում նշեց Նաիրա Զոհրաբյանը, ԱԺ երկու մշտական հանձնաժողովների անդամները հանդիպելու են մատը կտրած դատապարտյալ Կարեն Թառոյանին, աչքերը կարած Հայկ Գալստյանին և փուչիկների գործով դատապարտված Սերոբ Բոզոյանին։

«Տիգրան Առաքելյանի գործով ես բազմիցս ասել եմ և հիմա էլ մնում եմ այն կարծիքին, որ պատիժը համարժեք չէր։ Փուչիկների գործով դատապարտված Սերոբ Բոզոյանին ևս այցելելու ենք, ես այդ մարդու համար շատ եմ ցավում, և կարծում եմ՝ այդ մարդու հանդեպ վճիռը պետք է վերանայվի, որովհետև քաղցկեղով, ըստ էության, անբուժելի հիվանդ է, և այդ խնդիրը մենք անպայման պետք է դիտարկենք լսումների ընթացքում»,-ասաց Նաիրա Զոհրաբյանը։