Շղթայական ավտովթար-վրաերթ Արագածոտնի մարզում․ վրաերթի է ենթարկվել 12-ամյա աղջնակ

Այսօր՝ հունիսի 16-ին, շղթայական ավտովթար-վրաերթ է տեղի ունեցել Արագածոտնի մարզում։ Ժամը 17։20-ի սահմաններում Audi մակնիշի ավտոմեքենան Աշտարակ քաղաքի Սիսակյան փողոցում դեպի սովետական տարիներից հայտնի «Աշտարակ» հյուրանոցային համալիրի հարևանությամբ բախվել է կայանված Chevrolet մակնիշի ավտոմեքենային։

Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով Chevrolet-ն առաջ է ընթացել և վրաերթի ենթարկել նշված վայրով անցնող մոտ 12-ամյա աղջնակին, ապա Audi-ն էլ բախվել է կայանված Range Rover-ին, որն էլ բախվել է կայանված Toyota Alphard-ին,Վրաերթի ենթարկված երեխային առաջինը օգնության են հասել քաղաքացիները և օպերատիվորեն ժամանած «Աշտարակ» բժշկական կենտրոնի շտապօգնության բժիշկների հերթապահ խումբը, ովքեր երեխային մինչև «Աշտարակ» ԲԿ տեղափոխելը, տեղում առաջին բուժօգնություն են ցուցաբերել։ Աշտարակ ԲԿ-ից էլ երեխային ռեանիմոբիլով տեղափոխել են Երևանի «Սուրբ Աստվածամայր» բժշկական կենտրոն։