Երասխի դեպքերից հետո Ֆրանսիան կոչ է արել պաշտպանել խաղաղ բնակչությանը Ադրբեջանի կրակոցներից

Ֆրանսիան ափսոսանք է հայտնում Հայաստանի և Ադրբեջանի սահմանի մի քանի կետերում վերջին 48 ժամվա ընթացքում տեղի ունեցած զինված միջադեպերի առիթով, այդ թվում՝ կրակոցների, որոնք հարվածել են Հայաստանի տարածքում գտնվող Երասխի խաղաղ բնակչությանը։ Փարիզը զսպվածության, լարվածության թուլացման և խաղաղ բնակչության պաշտպանության կոչ է անում, ասվում է Ֆրանսիայի ԱԳՆ կայքում տեղադրված հաղորդագրության մեջ։

Հայտարարության համաձայն, Ֆրանսիան նաև հաստատում է իր աջակցությունը Արդարադատության միջազգային դատարանի 2023 թվականի փետրվարի 22-ի վճռի լիակատար կատարմանը Ադրբեջանի կողմից ապօրինի արգելափակված Լաչինի միջանցքով՝ Արցախի Հանրապետությունը Հայաստանի և արտաքին աշխարհի հետ կապող միակ ճանապարհի երկայնքով երթևեկությունը վերականգնելու վերաբերյալ։ 

«Ֆրանսիան լիովին մոբիլիզացված է խաղաղությունը վերականգնելու համար՝ ի շահ տարածաշրջանի ողջ բնակչության: Հայաստանի և Ադրբեջանի միջև բանակցությունները շարունակվել են ամենաբարձր մակարդակով հունիսի 1-ին Քիշնևում՝ Եվրոպական քաղաքական համայնքի գագաթնաժողովի շրջանակներում։

Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը հանդիպել են Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, Եվրոպական խորհրդի նախագահ Շառլ Միշելի հետ։

Այս հանդիպմանը նշվել է քննարկվող տարբեր հարցերի շուրջ առաջ շարժվելու ցանկությունը, որոնք պետք է լուծվեն բացառապես բանակցությունների միջոցով։

Ֆրանսիայի արտաքին գործերի նախարար Քեթրին Կոլոննան նույնպես ապրիլին այցելեց Հայաստան և Ադրբեջան՝ օգնելու երկրներին շարժվել դեպի խաղաղ համաձայնագիր։ Այդ ջանքերն իրականացվում են Եվրամիության և ԱՄՆ-ի հետ սերտ համակարգմամբ»,- ասված է հայտարարության մեջ: