«Ռուսաստանին մեղադրելը այս իշխանության գոյապահպանական մեխանիզմի մի մասն է կազմում»

Այսօր մեկնարկեց Արցախյան 44-օրյա պատերազմի հանգամանքներն ուսումնասիրող Ազգային ժողովի քննիչ հանձնաժողովի նիստը, որի ժամանակ ՀՀ վարչապետը կատարեց հետևյալ հայտարարությունը․ «Պուտինին ուղիղ հարցրի՝ ի՞նչ պետք է անեմ, որ կրակը դադարեցվի, ասաց՝ հինգ շրջանները պետք է տալ»։

ԼՈՒՐԵՐ․com-ի հետ զրույցում քաղաքագետ Էդգար Էլբակյանն այն տեսակետը հայտնեց, թե ցանկացած իշխանություն, ցանկացած ուժ, որը պայքարում է իշխանության համար, խաղում է որոշակի կանոններով, որոնք ունիվերսալ են․

«Ունիվերսալ կանոններից մեկը այն է, որ մարդիկ հավատան, որ քո իշխանությունը արդար է և ճիշտ է, դու իրավունք ունես իշխելու։ Ռուսաստանին մեղադրելը նաև երկրորդ բաժինն է կազմում այս իշխանության գոյապահպանական մեխանիզմի։ Իրենք ամբողջությամբ աջակցվում են Թուրքիայի, Ամերիկայի և Մեծ Բրիտանիայի կողմից, և բնական է, որ դրա գինը Ռուսաստանին այս տարածաշրջանից հեռացնելն է։

Այստեղ գործ ունենք մանիպուլացնող դասական մեխանիզմի հետ, որ կոնտեքստից կտրված է ներկայացնում փաստերը։ Անշուշտ, Վլադիմիր Պուտինը նման պատասխան տվել է, բայց Պուտինը հղում է արել բանակցային առկա  նախապատերազմական տարբերակներին, իսկ պատերազմից առաջ՝ նախկին իշխանությունների օրոք, նախատեսվում էր, որ հինգ շրջանը տրվելու էր, բայց ոչ թե հենց այնպես, այլ փաթեթային լուծում էր ունենալու, այսինքն՝ դրա դիմաց Արցախը ունենալու էր միջանկյալ կարգավիճակ, խաղաղապահները տեղակայվելու էին ոչ թե բուն Արցախում այլ Արցախի շուրջ, այսինքն՝ հանձնվող տարածքներում և այլն»,-ասաց նա։

Էլբակյանի կարծիքով ՀՀ իշխանությունը ամեն ինչ արեց, որ բանակցային գործնթացը տապալվի և բանը հասնի պատերազմին.

«Պատերազմում մեր պարտությունից հետո արդեն պարզ էր, որ  Ադրբեջանի պահանջները ավելի շատ էին աճելու և պարզ է, որ այդ ժամանակ մեզնից պահանջելու էին հինգ շրջանը հանձնել առանց որևէ այլ բանի»։

Այն հարցին, թե արդյոք հնարավոր է առաջիկակում պատերազմ և իշխանությունը այս ամենի  մասին այժմ խոսում է, որպեսզի կնքի կապիտուլացիոն պայմանագիր և հետագայում կարողանա արդարանա՞լ, Էլբակյանը պատասխանեց, որ լիովին հնարավոր է.

«Իրենք գիտեն, որ պատերազմը անխուսափելի է, իրենք երկիրը չեն պատրաստել պատերազմի, այլ պատրաստել են նորանոր կապիտուլիացիաների, դրա համար տեղեկատվական նախնական պատրաստություն են իրականացնում»,-նշեց մեր զրուցակիցը։