Բաղրամյան-Մաշտոց-Մոսկովյան խաչմերուկի պուրակի ստորգետնյա շինությունն օտարվել է օրենքի խախտմամբ

Երևան քաղաքի Մարշալ Բաղրամյան, Մեսրոպ Մաշտոց պողոտաների և Մոսկովյան փողոցի միջև ընկած պուրակի ստորգետնյա շինությունը 2017 թվականի մարտի 25-ին, օրենքի խախտմամբ, օտարվել է «Ֆոտոմաստեր» ՍՊ ընկերությանը: Այս մասին տեղեկանում ենք ՀՀ Գլխավոր դատախազության պաշտոնական կայքից։

Երևան քաղաքի Կենտրոն և Նորք Մարաշ վարչական շրջանների դատախազությունում, պետական (համայնքային) շահերի պաշտպանության հայց հարուցելու լիազորության շրջանակում իրականացված ուսումնասիրությամբ պարզվել է, որ 2001 թվականի փետրվարի 12-ին «Կանաչապատում» ՊՓԲԸ-ի և «Ֆոտոմաստեր» ՍՊ ընկերության միջև կնքվել է Պուրակում գտնվող տարածքի վարձակալության պայմանագիր: Պայմանագրի համաձայն՝ Պուրակը (4668 քմ) 25 տարի ժամկետով վարձակալությամբ հանձնվել է «Ֆոտոմաստեր» ընկերությանը:

2014 թվականի հուլիսի 8-ին Ընկերության բաժնեմասերի նկատմամբ գրանցվել է Արտյոմ և Գուրգեն Խաչատրյանների սեփականության իրավունքը: Նույն թվականի օգոստոսի 4-ին Ընկերությանը տրվել է շինարարության թույլտվություն՝ պուրակում սրճարանների տաղավարների ստորգետնյա շինության կառուցման աշխատանքների կատարման համար:

Երևանի քաղաքապետի՝ 2017 թվականի մարտի 25-ի որոշմամբ` 2001 թվականին կնքված վարձակալության պայմանագիրը լուծվել է: Նույն օրը, առանց մրցույթի, Ընկերության հետ կնքվել է վերոնշյալ հողամասի վարձակալության պայմանագիր՝ վարձակալության ժամկետ սահմանելով մինչև 2026 թվականի փետրվարի 12-ը:

2017 թվականի ապրիլի 12-ին Երևան քաղաքի Մոսկովյան փողոցի 29/4 հասցեում գտնվող 3923,54 քմ մակերեսով հողամասի նկատմամբ (հողամասի սահմանները վերաճշտվել են Երևանի քաղաքապետի 2017 թվականի փետրվարի 16-ի որոշմամբ) գրանցվել է «Ֆոտոմաստեր» ՍՊ ընկերության վարձակալության իրավունքն ու նույն օրը վերոնշյալ հողամասում գտնվող ընդհանուր 1737,06 քմ մակերեսով ստորգետնյա շինությունների նկատմամբ գրանցվել է Ընկերության սեփականության իրավունքը: Մինչդեռ, Երևանի քաղաքապետի 2017 թվականի փետրվարի 16-ի 415-Ա որոշման համաձայն՝ Մոսկովյան 29/4 հասցեում գտվող 3923,54 քմ մակերեսով հողամասն ընդգրկված է Հողային օրենսգրքի 60-րդ հոդվածով նախատեսված սահմանափակումների ցանկում (օտարման ոչ ենթակա տարածքներ):

Հաշվի առնելով, որ պաշտոնատար անձինք վերոնշյալ հողամասը վարձակալության իրավունքով, առանց մրցույթի, հանձնել են «Ֆոտոմաստեր» ընկերությանը, վարձակալության պայմանագիրը լուծելուց հետո ստորգետնյա շինությունները համայնքի գույքային հաշվեկշռում հաշվառելու փոխարեն՝ «Ֆոտոմաստեր» ընկերության համար ստեղծել են արտոնյալ պայմաններ և օրենսդրության կոպիտ խախտումներով ստորգետնյա շինությունների նկատմամբ գրանցել են Ընկերության սեփականության իրավունքը՝ Երևան քաղաքի Կենտրոն և Նորք Մարաշ վարչական շրջանների դատախազությունը 2023 թվականի օգոստոսի 24-ին հաղորդում է ներկայացրել Հակակոռուպցիոն կոմիտե:

Հակակոռուպցիոն կոմիտեում 2023 թվականի օգոստոսի 25-ին նախաձեռնվել է քրեական վարույթ՝ 18.04.2003 թվականին ընդունված Քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ):

Դատախազությունն առաջիկայում հայց կներկայացնի դատարան՝ Երևանի քաղաքապետի որոշումները վիճարկելու և այդ հիմքով՝ կատարված գործընթացներն անվավեր ճանաչելու պահանջով: