Պարզ լճի տարածքում թալանել են վաճառքի պատասխանատուի կացարանը. տարել են 16 մլն դրամ

SHAMSHYAN.com-ի տեղեկություններով սեպտեմբերի 18-ին առանձնապես խոշոր չափի գողություն է տեղի ունեցել Տավուշի մարզում: Այդ օրը ՀՀ Ներքին գործերի նախարարության Ոստիկանության Դիլիջանի բաժին է ահազանգել Երևանի բնակիչ 64-ամյա Գարեգին Մ.-ն և հայտնել, որ սեպտեմբերի 8-ի ժամը 22:30-ից մինչև սեպտեմբերի 18-ի ժամը 17:00-ն ընկած ժամանակահատվածում, անհայտ անձը կամ անձինք մուտքի բաց դռնով մուտք են գործել «Պարզ լճի» տարածքում գտնվող իր կողմից մշտապես օգտագործվող տնակի ննջասենյակ ու իրեն պատկանող սպորտային պայուսակի միջից գողացել գումար, ոսկյա մատանի երկու հատ ժամացույց և դիմել փախուստի:

Դեպքի վայր են մեկնել ոստիկանության Դիլիջանի բաժնի օպերատիվ խումբը՝ բաժնի պետի օպերատիվ գծով տեղակալ Ազատյանի  գլխավորությամբ:

Ժամանել են նաև Հայաստանի Քննչական կոմիտեի Տավուշի մարզային քննչական վարչության Դիլիջանի քննչական բաժնի խումբը:

Տեղում Գարեգին Մ.-ն հայտնել է, որ պայուսակում եղել է 16 մլն դրամ, իսկ ինքն էլ աշխատում է «Պարզ» ՍՊԸ-ում, որպես վաճառքի պատասխանատու:

Դեպքի փաստով Դիլիջանի քննչական բաժնում նախաձեռնվել է քրեական վարույթ: