Լեռնային Ղարաբաղի բնակիչներն այս դժվարին պահին հայացքները հառել են մեզ. ՄԱԿ-ում ԱՄՆ մշտական ​​ներկայացուցիչ

ԱՄՆ-ը լրջորեն անհանգստացած է Լեռնային Ղարաբաղում տիրող դրությամբ` կապված Ադրբեջանի կողմից շարունակվող ռազմական գործողությունների հետ։ Այս մասին ՄԱԿ-ի Անվտանգության խորհրդի նիստի ժամանակ հայտարարել է ՄԱԿ-ում ԱՄՆ մշտական ​​ներկայացուցիչ Լինդա Թոմաս-Գրինֆիլդը։

«Մենք կոչ ենք անում անհապաղ դադարեցնել այդ ռազմական գործողությունները։ Մենք տեղյակ ենք հայտարարություններին, թե նման գործողություններն առայժմ դադարեցվել են։ Մենք հաստատում ենք, որ սա դրական զարգացում է, բայց առայժմ իրավիճակը տեղերում չափազանց բարդ է։

Մենք անհանգստացած ենք քաղաքացիական բնակչության նկատմամբ բռնության մասին հաղորդումներով։

Ես հստակ կասեմ, որ Ադրբեջանը պատասխանատվություն է կրում ապահովելու, որ իր ուժերը խստորեն պահպանեն Միջազգային մարդասիրական իրավունքը, ինչպես նաև մարտական ​​գործողությունների կանոնները, պաշտպանեն խաղաղ բնակիչներին և մարդասիրական վերաբերմունք ցուցաբերեն մարտիկների հանդեպ:

Ադրբեջանը նաև միջազգային պարտավորություններ ունի հարգելու իր տարածքում ապրող բոլոր մարդկանց  իրավունքները և հիմնարար ազատությունները»,- նշել է դիվանագետը։

Նա ասել է, որ Միացյալ Նահանգները կոչ է անում երկու կողմերին ապահովել, որպեսզի մարդասիրական կազմակերպությունները կարողանան մատակարարել սնունդ, դեղորայք և այլ կարևոր պարագաներ և ապահովել դրանց պահպանությունն ու անվտանգությունը:

«Այս շաբաթվա ընթացքում մենք ողջունեցինք Լաչինի միջանցքով մարդասիրական ապրանքների առաքումը Լեռնային Ղարաբաղ։ Սա չափազանց նշանակալից առաջընթաց քայլ էր, սակայն հիասթափեցնող է, որ ռազմական գործողությունները սկսվեցին վստահության ամրապնդման նման դրական գործողությունից մեկ օր անց:

Ինչպես հրապարակայնորեն հայտարարել է Ադրբեջանը, ինքը վճռական է մեղմելու Լեռնային Ղարաբաղում առկա հումանիտար իրավիճակը և բաց հասանելիությունը սննդի, կացարանի, սննդի, էլեկտրաէներգիայի և գազի մատակարարումների համար»,- ընդգծել է Լինդա Թոմաս-Գրինֆիլդը:

«Լեռնային Ղարաբաղի բնակիչներն այս դժվարին պահին հայացքները հառել են մեզ»,– ընդգծեց նա։