Կարծում եմ՝ Փաշինյանը կգա Սանկտ-Պետերբուրգ՝ ստանձնելու Պուտինի էստաֆետը. Ուշակով

Ռուսաստանի Դաշնության նախագահի օգնական Յուրի Ուշակովը կարծում է, որ Հայաստանի վարչապետ Նիկոլ Փաշինյանը դեկտեմբերին Սանկտ-Պետերբուրգում կմասնակցի Եվրասիական տնտեսական բարձրագույն խորհրդի նիստին և ԱՊՀ ոչ պաշտոնական գագաթնաժողովին։

«Կարծում եմ, որ հայկական պատվիրակության ներկայացուցիչները կգան Սանկտ Պետերբուրգ: Կլինի ԱՊՀ երկրների ղեկավարների ոչ պաշտոնական հանդիպում, ավանդական, և կլինի ԵԱՏՄ-ի նիստը»,- լրագրողներին ասել է Ուշակովը Մինսկում կայացած ՀԱՊԿ գագաթնաժողովի ժամանակ՝ հավելելով. «Ի դեպ, այս հանդիպման ժամանակ Հայաստանը մեզնից հետո դառնում է նախագահ, ուստի կարծում եմ, որ Փաշինյանը կգա ստանձնելու Վլադիմիր Վլադիմիրովիչ Պուտինի էստաֆետը»:

Հարցին՝ Մինսկում կայացած ՀԱՊԿ նիստին Հայաստանի ներկայացուցիչների բացակայությունը  ցուցադրական քա՞յլ է կազմակերպությունից Երևանի դուրս գալու ուղղությամբ, Ուշակովն ասել է. «Սա նշանակում է, որ նրանք այսօր չեն եկել հանդիպման և գործնականում չեն մասնակցել դրա նախապատրաստմանը»։