Գիտնականները ցույց են տվել, թե ինչպիսի տեսք կունենան շները 10 հազար տարի հետո

ԱՄՆ-ում ընտանի կենդանիների գենետիկական թեստավորման մեջ մասնագիտացած ընկերության մասնագետները ցույց են տվել, թե ինչպիսի տեսք կունենան շները 10 հազար տարի հետո, գրում է Interesting Engineering պորտալը։

Ապագայի շների տեսքը մոդելավորելու համար գենետիկները միավորել են իրենց ուժերն անասնաբույժ Էռնի Ուորդի հետ: Փորձագետները ենթադրում են, որ ընտանի կենդանիների տեսքը կախված կլինի նրանից, թե Երկրին գլոբալ տաքացում է սպասվում, թե հակառակը՝ սառցե դարաշրջան:

Եթե ​​մոլորակն էլ ավելի տաքանա, ապա 10 հազար տարի հետո շներն ավելի քիչ մարմնի զանգված կունենան, քան հիմա։ Փոքր մարմինները պահանջում են ավելի քիչ սնունդ և էներգիա: Մաշկի մակերեսի նվազումը լրացուցիչ առավելություն կունենա՝ պաշտպանելով շանը վնասակար ուլտրամանուշակագույն ճառագայթումից:

Ջերմաստիճանի բարձրացումը շների մոտ նաև կհանգեցնի մազաթափության։ Փորձագետները նշում են, որ ընտանի կենդանիները կարող են նույնիսկ ավելի ակտիվ դառնալ գիշերը, ինչպես նաև կարող են մեծանալ նրանց գլուխներն ու ականջները:

Եթե ​​Երկրին սպասում է զգալի սառչում, շների մորթին կդառնա ավելի հաստ և ծավալուն: Կենդանիներն ավելի շատ ճարպ կկուտակեն, որը կծառայի որպես էներգիայի ռեզերվուար։ Ուորդը ենթադրում է, որ այդ դեպքում շները կարող են վերադառնան գայլի տեսքին՝ ավելի ուժեղ մկաններով, որոնք անհրաժեշտ են որսի և վազքի համար: