Բայրամովը միջազգային հանրությանը կոչ է արել զերծ մնալ «սադրիչ գործողություններից»

«Եկել է ժամանակը օգտվելու Ադրբեջանի և Հայաստանի միջև խաղաղություն հաստատելու հնարավորությունից»։

Ինչպես հաղորդում է Trend-ը, այս մասին ԵԱՀԿ նախարարական 30-րդ համաժողովին իր ելույթում հայտարարել է Ադրբեջանի արտգործնախարար Ջեյհուն Բայրամովը։

«Չնայած խաղաղությանն ուղղված «Ադրբեջանի միանշանակ հանձնառությանը», գործընթացը ձգձգվում է: Հայաստանից պահանջվեց ավելի քան 2.5 ամիս, որպեսզի վերջնականապես ներկայացնի իր մեկնաբանությունները համաձայնագրի նախագծի վերաբերյալ: Նմանապես, որոշ կողմերի կողմնակալ և միակողմանի գործողությունները լրջորեն ազդում են գործընթացի վրա: Մենք շարունակում ենք վստահորեն հավատալ, որ «Ադրբեջանն ու Հայաստանը լավ հարաբերություններ հաստատելու և որպես երկու պետություն խաղաղ գոյակցելու պատմական հնարավորություն ունեն»: Եկել է այս հնարավորությունից օգտվելու ժամանակը»,- ​​ասել է ադբեջանցի նախարարը։

«Մյուս խաղացողների կողմից շարունակվող աշխարհաքաղաքական ազդեցությունը հակաարդյունավետ է, քանի որ այն ծառայում է միայն առճակատմանը և ձգձգման պահպանմանը: Միջազգային հանրությունը նույնպես պարտավոր է զերծ մնալ սադրիչ գործողություններից և նվազեցնել լարվածությունը, ներառյալ ԵԱՀԿ-ում»,- ասել է Բայրամովը:

Ադրբեջանցի նախարարը նաև հայտարարել է, թե իբր Հայաստանը ծրագրել էր «հաշվեհարդար տեսնել Ադրբեջանի նկատմամբ»՝ այս կերպ փորձելով արդարացնել Արցախի նկատմամբ ադրբեջանական ագրեսիան։

«Չնայած Հայաստանի բանավոր հայտարարություններին և Ադրբեջանի ինքնիշխանության ճանաչմանը, իրականությունն այն է, որ Հայաստանը ձգտում էր ժամանակ շահել հաշվեհարդար տեսնելու համար»,– ասել է նա։