Ինչպես ամրապնդել իմունային համակարգը ձմռանը

Ամերիկյան սրտաբանական ասոցիացիայի և Մայո կլինիկայի մասնագետները Health News-ին հայտնել են, որ ձմռանը առողջ մնալու համար պետք է ուտել բավականաչափ միրգ և բանջարեղեն։

Բանն այն է, որ մրգերն ու բանջարեղենը պարունակում են բջջանյութեր, վիտամիններ, հանքանյութեր և հակաօքսիդանտ միացություններ, որոնք օգտակար են առողջության համար: Բջջանյութը նորմալացնում է աղիների աշխատանքը: Հակաօքսիդանտ միացությունները պաշտպանում են մարմնի բջիջները օքսիդացման հետևանքով առաջացած վնասներից: Առողջապահության համաշխարհային կազմակերպությունը (ԱՀԿ) մեծահասակներին խորհուրդ է տալիս օրական հինգ չափաբաժին միրգ և բանջարեղեն օգտագործել: Մեկ չափաբաժին նշանակում է մեկ միջին չափի միրգ կամ բանջարեղեն:

Նշվում է, որ ավելի լավ է օգտագործել սեզոնային մրգեր և բանջարեղեն՝ մանդարին, նարինջ, տանձ, գազար, ճակնդեղ և շաղգամ: Ցիտրուսային մրգերն ու տանձը պարունակում են վիտամին C, որն անհրաժեշտ է իմունիտետը պահպանելու համար։ Դրանք նաև հարուստ են վիտամին A-ով, որն օգտակար է տեսողության և սրտանոթային համակարգի առողջության համար: Այս վիտամինը նաև բարելավում է օրգանիզմի՝ օտար նյութերն ու բջիջները ճանաչելու և հեռացնելու ունակությունը:

Գազարը, շաղգամը և ճակնդեղը հարուստ են A, C, K և B վիտամիններով, ինչպես նաև միներալներով, ինչպիսիք են կալիումը և մագնեզիումը: Դրանք անհրաժեշտ են արյան մակարդումն ապահովելու, ինչպես նաև ոսկորների և սրտի առողջության համար: