Տղամարդը 99 տարվա ազատազրկման է դատապարտվել ոչ սթափ վիճակում ավտոմեքենա վարելու համար

ԱՄՆ-ում դատարանը տղամարդուն դատապարտել է 99 տարվա ազատազրկման այն բանից հետո, երբ նա յոթերորդ անգամ ձերբակալվել է ոչ սթափ վիճակում ավտոմեքենա վարելու համար, գրում է Fox News-ը։

ԶԼՄ-ների տվյալներով՝ Վիրջիլ Բրայանթը ձերբակալվել է Տեխասում։ Ոստիկանները տղամարդու մեքենայում ալկոհոլի շշեր են հայտնաբերել, իսկ նրա արյան մեջ ալկոհոլի կոնցենտրացիան երեք անգամ գերազանցել է թույլատրելի սահմանը։

Հաղորդվում է, որ 14 տարվա ընթացքում Վիրջիլին 7 անգամ ձերբակալել են ոչ սթափ վիճակում մեքենա վարելու համար: Բացի այդ, 2009 թվականին տղամարդը դատապարտվել է 40 տարով ազատազրկման, սակայն 2019 թվականին նա պայմանական վաղաժամկետ ազատ է արձակվել։

Այն բանից հետո, երբ նրան կրկին ձերբակալել են հարբած վիճակում մեքենա վարելու համար, դատարանը նրան դատապարտել է 99 տարվա ազատազրկման։ Գործը քննելիս երդվյալ ատենակալները եկել են այն եզրակացության, որ տղամարդը կարող էր մեքենան օգտագործել որպես զենք՝ ոչ սթափ վիճակում վարելիս: