Ինչո՞ւ անվճար չեն մաքսազերծում Voyah free, Lixiang Li 7, Changan Shenlan 7 և այլ էլեկտրահիբրիդային մեքենաները. ներկրողները կանգնած են խնդրի առաջ

Հասարակություն 9 Դեկտեմբեր, 2023 13:00

Ինչպես հայտնի է՝ 2023-ի ընթացքում ԵԱՏՄ ԱՏԳ Աև 8703 80 000 2 ծածկագրին դասվող էլեկտրաշարժիչով շարժիչային տրանսպորտային միջոցների ՀՀ ներմուծումը թույլատրվում է 0 տոկոս ներմուծման մաքսատուրքի դրույքաչափի կիրառման պայմանով՝ 7400 հատից ոչ ավելի ծավալով։

Թեև Պետական եկամուտների կոմիտեն հայտարարում է, որ այդ էլեկտրամոբիլների համար ներմուծման մաքսատուրք չի գանձվում, սակայն ԼՈՒՐԵՐ․com-ը դժգոհություններ է ստացել Voyah free, Lixiang Li 7 , Changan Shenlan 7 և այլ էլեկտրահիբրիդային մեքենաների ներմուծման դեպքում առաջացած խնդիրների վերաբերյալ:

Ներկրողները բողոքում են՝ նշելով, որ թեև դրանք չեն աշխատում բենզինով, սակայն Հայաստանում խոչընդոտներ են առաջանում. համապատասխան մարմինները անվճար մաքսազերծում չեն իրականացնում՝ պահանջելով գումար: Այսինքն ձգձգում են գործընթացը՝ պատճառաբանելով, թե ամեն դեպքում դրանք համարվում են բենզինի միջոցով շարժվող մեքենաներ, քանի որ դրանց դեպքում բենզինը շարժում է ոչ թե անիվները, այլ սնուցում է էլեկտրական մարտկոցը:

Ստացվում է՝ ներկրողները փորձում են ներկրել մեքենաներ՝ հիմնվելով այն հագամանքի վրա, որ դրանք էլեկտրահիբրիդային են, սակայն կանգնում են խնդրի առաջ:

ԼՈւՐԵՐ.com-ը նաև հարցում է իրականացնելու ՊԵԿ-ից՝ պարզելու, թե ի վերջո ո՞րն է ստեղծված իրավիճակի պատճառը և ելքը: