Մոսկվայում կանցկացվի «Ռուսաստան-Հայաստան» առաջին հանրային ֆորումը

Դեկտեմբերի 15-ին Մոսկվայում կանցկացվի «Ռուսաստան-Հայաստան» առաջին հասարակական ֆորումը, որին կմասնակցի ավելի քան 300 բանախոս, գրում է ՏԱՍՍ-ը։

Միջոցառման կազմակերպիչներն են Ռուսաստանի Դաշնության Հասարակական պալատը, «Միասին» հասարակական կազմակերպությունը և «Միջազգային համագործակցության լիդերներ» ինքնավար ոչ առևտրային կազմակերպությունը: Քննարկման թեմաներից են «Պատմական հիշողության պահպանումը՝ որպես Ռուսաստանի և Հայաստանի միջև երկարաժամկետ համագործակցության զարգացման հիմք», «Հանրային դիվանագիտության դերն ու տեղը երկկողմ հարաբերությունների զարգացման գործում», «ԶԼՄ-ները՝ որպես անբաժանելի մաս քաղաքական փոխգործակցության պատկերներ ստեղծելու գործում»:

«Միջազգային հարաբերությունների համակարգի փոխակերպումը ներկա փուլում թելադրում է համագործակցության ընդլայնման և Ռուսաստանի ու Հայաստանի միջև փոխգործակցության բոլոր խոչընդոտների հաղթահարման անհրաժեշտությունը: Երկու պետությունների դաշնակցային հարաբերությունների ռազմավարական բնույթն արտահայտված է բոլոր մակարդակներում, և «Ռուսաստան-Հայաստան» հանրային ֆորումը «կարևոր սկիզբ կդառնա երկու երկրների միջև երկխոսության նոր փուլի համար։ Այն կարևոր դեր կունենա Ռուսաստանի և Հայաստանի միջև համագործակցության նոր մեխանիզմների ստեղծման և փոխգործակցության՝ գոյություն ունեցող ձևաչափերի ամրապնդման գործում», - ֆորումի մամուլի ծառայությունը մեջբերում է  ֆորումի կազմակերպիչ Մհեր Ավետիսյանի խոսքերը։

Կազմակերպիչները նշում են, որ միջոցառման շրջանակներում տեղի կունենան լիագումար նիստ, թեմատիկ նիստեր, երկկողմ նախագծերի ներկայացում, համագործակցության համաձայնագրերի ստորագրում և բանաձևի ձևավորում։