Ձկնաբույծները կրկին բողոքի ակցիա են իրականացնում. նրանք վաղ առավոտից նախարարության շենքի դիմաց են

Ձկնաբույծներն այսօր կրկին վաղ առավոտից հավաքվել են կառավարության 3-րդ մասնաշենքի դիմաց՝ բողոքի ակցիա իրականացնելու և ինչպես իրենք են պնդում՝ իրենց արդար պահանջը ներկայացնելու, քանի որ դժգոհ են ԱԺ-ում ընդունված ձկնաբուծական տնտեսությունների վերաբերյալ օրենքից:

Բանն այն է, որ Շրջակա միջավայրի նախարարությունից խոստացել էին ընդունել ձկնաբույծներին՝ հարցը քննարկելու, երկուստեք ընդհանուր հայտարարի գալու համար, սակայն անցել է շուրջ երկու շաբաթ, բայց նրանց հետ որևէ մեկը չի հանդիպել:

Հիշեցնենք՝ խորհրդարանում նոյեմբերի 22-ին երկրորդ և վերջնական ընթերցմամբ ընդունվել է ջրային օրենսգրքում փոփոխությունների նախագիծը, ըստ որի՝ Հայաստանի ձկնաբուծական տնտեսությունները, որոնք ջուր են ստանում ստորգետնյա հորատանցքերից, պետք է օգտագործեն միայն ջրի շրջանառության խնայող համակարգեր։ Ինչպես օրինագիծը ներկայացնելիս հայտարարել է շրջակա միջավայրի նախարար Հակոբ Սիմիդյանը՝ նման համակարգերը պետք է թույլ տան վերաօգտագործել ջրի առնվազն 40 տոկոսը: «Հայաստանում 300 տնտեսվարող իրենց գիտելիքները, կապիտալը ներդրել են, որ հիմնարկություն ստեղծեն, մեզնից ամեն մեկը արտադրություն տվող, աշխատատեղ ստեղծող է, ջուրը վերցնելով՝ արդյունք ենք տալիս, մենք սխալ ջուր օգտագործող չենք… Հայաստանի հանրապետությունն էլ ինքնաբավ ենք պահում: Աշխարհում նման բան չկա, բոլոր խանութներում թարմ ձուկ է վաճառվում: Կառավարությունն ինչ ուզել է այսքան ժամանակ, արել ենք: Բայց հիմա այնպիսի մեթոդ են առաջարկում, որ աշխարհում նման մեթոդ չկա… անծով երկրում, մենք այսօր 20-30.000 տոննա ձկնամթերք ենք արտադրում»,- լրագրողներին ասաց ձկնաբույծներից մեկը: